સરકારના ભંડોળની સહાય સાથેના પ્રોજેકટસ ખર્ચમાં સરેરાશ 18 ટકા વધારો

મુંબઇ : કેન્દ્ર સરકારના ભંડોળની સહાયથી ઊભા થઈ રહેલા માળખાકીય પ્રોજેકટસ પાછળના એકંદર ખર્ચમાં ડિસેમ્બરના અંતે સરેરાશ ૧૮ ટકાથી વધુનો વધારો થયો છે. 

હાલમાં ચાલી રહેલા ૧૩૯૨ માળખાકીય પ્રોજેકટસનો એકંદર વિકાસ ખર્ચ જે રૂપિયા ૨૯.૭૦ ટ્રિલિયન અંદાજાયો હતો તે વધી રૂપિયા ૩૫.૧૦ ટ્રિલિયન પહોંચી ગયો છે. રૂપિયા ૧૫૦ કરોડ કે તેથી વધુના ખર્ચ સાથેના પ્રોજેકટસ માટે તૈયાર કરાયેલા એક રિપોર્ટમાં જણાવાયું હતું.

ડિસેમ્બરમાં ખર્ચમાં થયેલો વધારો નવેમ્બરની સરખામણીએ ઓછો જોવા મળ્યો છે. નવેમ્બરમાં ખર્ચમાં ૨૨ ટકા વધારો થયો હતો. 

મૂલ્યની દ્રષ્ટિએ ખર્ચમાં રૂપિયા ૫.૪૨ ટ્રિલિયનનો વધારો થયો છે. 

વિભાગ પ્રમાણે જોવા જઈએ તો જળ સ્રોતો તથા નદી વિકાસ ખાતાના ખર્ચમાં ૧૦૨.૧૨ ટકા વધારો થઈ તે રૂપિયા ૧૯૭૬૩૩ .૧૨ કરોડ પહોંચી ગયો છે. મૂળ યોજના પ્રમાણે ખર્ચ રૂપિયા ૯૭૭૭૯.૩૫ કરોડ અંદાજાયો હતો.

૮૦.૩૫ ટકા વધારા સાથે બીજા ક્રમે સંદેશવ્યવહાર વિભાગના પ્રોજેકટસનો સમાવેશ થાય છે. સંદેશવ્યવહાર વિભાગનો  અંદાજિત ખર્ચ રૂપિયા ૧૨૨૦૯૨ કરોડ વધી રૂપિયા ૨,૭૪,૦૧૬ કરોડ પહોચી ગયો હોવાનું પ્રાપ્ત ડેટા જણાવે છે.

જે અન્ય વિભાગોના ખર્ચમાં વધારો થયો છે તેમાં માઈન્સ, રેલવેસ, સ્ટીલ, પાવર,પેટ્રોલિયમ, આરોગ્ય, શ્રમ તથા રહેઠાણ વિભાગનો મુખ્યત્વે સમાવેશ થાય છે. પ્રોજેકટસ જાહેર થયા બાદ જમીન સંપાદન, પર્યાવરણિય મંજુરીમાં તથા અન્ય કાનૂની પ્રક્રિયામાં ઢીલને પરિણામે પ્રોજેકટસ ખર્ચ વધી જતા હોય છે એમ સરકારી સુત્રોએ જણાવ્યું હતું.