ફ્યુલ જેટ મોંઘું થતાં ઈન્ડિગોએ આ રુટની ફ્લાઈટોમાં કર્યો ઘટાડો, હવે અઠવાડિયામાં 2 દિવસ જ ફ્લાઈટ

Aviation Fuel Surge Forces IndiGo Flight Cuts: એવિએશન ટર્બાઇન ફ્યુઅલ (ATF)ના ભાવમાં સતત થઈ રહેલા વધારાની સીધી અસર હવે સ્થાનિક હવાઈ મુસાફરી પર સ્પષ્ટપણે જોવા મળી રહી છે. સપ્ટેમ્બર મહિનામાં ATFના ભાવમાં 5.5%નો વધારો થતાં કિંમત પ્રતિ લિટર અંદાજે ₹121.3 પર પહોંચી ગઈ છે. ઓપરેશનલ ખર્ચ વધવાના કારણે એરલાઇન્સ કંપનીઓએ પોતાના ફ્લાઇટ શેડ્યૂલમાં કાપ મૂકવાની ફરજ પડી છે. આ દબાણ હેઠળ ઇન્ડિગોએ ગાઝિયાબાદ સ્થિત હિંડન એરપોર્ટ પરથી સંચાલિત થતી કેટલીક મુખ્ય સ્થાનિક ફ્લાઇટ્સની ફ્રીક્વન્સીમાં મોટો ઘટાડો કર્યો છે અને હવે એરલાઇન અહીંથી માત્ર 5 રૂટ પર જ સેવાઓ આપી રહી છે.

કોલકાતા, નવી મુંબઈ અને વારાણસી રૂટ પર ફ્લાઇટ્સ ઘટી

ઇન્ડિગોએ હિંડન એરપોર્ટથી મુસાફરોની અવરજવર ધરાવતા ત્રણ મહત્ત્વપૂર્ણ રૂટ્સ પર ફ્લાઇટ ફેરા ઘટાડી દીધા છે:

• કોલકાતા: અગાઉ દરરોજ ઉપલબ્ધ ડેઇલી ફ્લાઇટ હવે સપ્તાહમાં માત્ર 2 દિવસ (સોમવાર અને રવિવાર અથવા બુધવાર અને રવિવાર) જ ઉડાન ભરશે.
• નવી મુંબઈ: ડેઇલી ફ્લાઇટ સર્વિસ ઘટાડીને સપ્તાહમાં માત્ર 4 દિવસ કરી દેવામાં આવી છે.
• વારાણસી: અઠવાડિયામાં 6 દિવસ ચાલતી ફ્લાઇટ હવે ઘટાડીને 5 દિવસ (સોમવાર, બુધવાર, શુક્રવાર અને શનિવારના શેડ્યૂલ મુજબ) કરી દેવાઈ છે.

હિંડનથી હાલમાં માત્ર 5 રૂટ પર જ ઉડાન

હાલમાં ઇન્ડિગો હિંડન એરપોર્ટથી માત્ર વારાણસી, બેંગલુરુ, કોલકાતા, ચેન્નાઈ અને નવી મુંબઈ માટે સેવાઓ ચલાવી રહી છે. જેમાં બેંગલુરુની ફ્લાઇટ યથાવત રીતે દરરોજ ચાલુ રહેશે, જ્યારે ચેન્નાઈ માટે સોમવાર, મંગળવાર, ગુરુવાર અને શનિવારે ફ્લાઇટ્સનું સંચાલન કરવામાં આવી રહ્યું છે.

શા માટે ફ્લાઇટ્સની સંખ્યા ઘટાડવી પડી?

ઇન્ડિગોના અધિકારીઓના જણાવ્યા મુજબ, જેટ ફ્યુઅલની વધતી કિંમતો અને ઓપરેશનલ કોસ્ટમાં થયેલા તોતિંગ વધારાના કારણે આ નિર્ણય લેવો પડ્યો છે:

• કોઈપણ એરલાઇનના કુલ ઓપરેશનલ ખર્ચમાં ઇંધણનો હિસ્સો લગભગ 40%થી 60% જેટલો મોટો હોય છે. તેથી ATF મોંઘું થતાં જ એરલાઇન્સ પર સીધો નાણાકીય બોજ પડે છે.
• પશ્ચિમ એશિયામાં ચાલી રહેલી તંગદિલીને લીધે વૈશ્વિક સ્તરે ઇંધણના ભાવ ભડકે બળી રહ્યા છે.
• આ ખોટને નિયંત્રિત કરવા માટે ઇન્ડિગોએ પોતાની ઘરેલું ક્ષમતામાં 5%થી 7%નો કાપ મૂક્યો છે, જ્યારે એર ઇન્ડિયાએ પોતાની ઉડાનોમાં 22% સુધીનો મોટો ઘટાડો કર્યો છે.

સતત ત્રીજા મહિને ATFના ભાવમાં ભડકો

છેલ્લા ત્રણ મહિનાથી એવિએશન ફ્યુઅલના ભાવ સતત વધી રહ્યા છે. જુલાઈમાં ભાવ ₹110 પ્રતિ લિટર હતા, જે ઓગસ્ટમાં વધીને ₹115 થયા અને હવે સપ્ટેમ્બરમાં 5.5% વધીને ₹121.3 પ્રતિ લિટર પહોંચી ગયા છે. ઇંધણ મોંઘું થવાની સીધી અસર ફ્લાઇટ ભાડાં, ફ્રીક્વન્સી અને ક્ષમતા પર પડી રહી છે.

હિંડન એરપોર્ટના ઓપરેશનલ પડકારો

હિંડન એરપોર્ટ પર જૂન મહિનામાં કોમર્શિયલ ફ્લાઇટ્સ શરૂ થઈ હતી અને ઇન્ડિગોએ જુલાઈ 2025માં અહીંથી 8 નવા રૂટ શરૂ કર્યા હતા. પરંતુ અમદાવાદ, ઇન્દોર અને પટના જેવા રૂટ્સ થોડા જ મહિનાઓમાં બંધ થઈ ગયા હતા. એર ઇન્ડિયા એક્સપ્રેસ આ ટર્મિનલ પરથી સંપૂર્ણપણે હટી ચૂકી છે, જેથી હવે માત્ર ઇન્ડિગો અને સ્ટાર એર જ અહીંથી સેવા આપે છે. હિંડન એરપોર્ટ ભારતીય વાયુસેના (IAF)નો મહત્ત્વનો એરબેઝ હોવાથી અહીં ફ્લાઇટ સંચાલનનો સમય મર્યાદિત રહે છે અને પ્લેન પાર્કિંગની સુવિધા પણ સીમિત છે.

મુસાફરોને સલાહ આપવામાં આવી છે કે હિંડનથી મુસાફરી કરતા પહેલાં IndiGo Official Website પર જે-તે દિવસનું ઉપલબ્ધ ફ્લાઇટ શેડ્યૂલ અગાઉથી ચકાસી લેવું.