સપ્ટેમ્બરમાં ફરી મોટી છટણીની તૈયારીમાં ઓરેકલ? સંભવિતોની યાદી તૈયાર કરવા મેનેજર્સને નિર્દેશ

Oracle Mass Layoffs: આઈટી અને ક્લાઉડ સર્વિસ પ્રોવાઈડર કંપની ઓરેકલમાં ફરી એકવાર મોટા પાયે કર્મચારીઓની છટણી થઈ શકે છે. અહેવાલો મુજબ, કંપનીએ પોતાના મેનેજર્સને એવા કર્મચારીઓની યાદી બનાવવાનું કહ્યું છે જેમને 1 સપ્ટેમ્બર પહેલાં નોકરીમાંથી છૂટા કરી શકાય. કંપની અગાઉ જ નાણાકીય વર્ષ 2026માં આશરે 21,000 કર્મચારીઓની છટણી કરી ચૂકી છે અને આ નવી છટણી તે ઉપરાંતની હશે. મીડિયા રિપોર્ટ અનુસાર, કેટલીક ટીમોમાંથી 10% કરતાં પણ વધુ કર્મચારીઓની છટણી કરવામાં આવી શકે છે.

AI અને ક્લાઉડ ઇન્ફ્રાસ્ટ્રક્ચરમાં અબજો ડોલરનું ભારે રોકાણ

ઓરેકલ તરફથી એક તરફ કર્મચારીઓની સંખ્યા ઘટાડવામાં આવી રહી છે, તો બીજી તરફ આર્ટિફિશિયલ ઇન્ટેલિજન્સ (AI) અને ક્લાઉડ ટેક્નોલોજીમાં મોટું રોકાણ કરવામાં આવી રહ્યું છે. કંપનીએ નાણાકીય વર્ષ 2026માં પોતાના ક્લાઉડ ઇન્ફ્રાસ્ટ્રક્ચરના વિસ્તાર માટે આશરે 55.7 બિલિયન અમેરિકન ડોલરનું મૂડીરોકાણ કર્યું છે. આ સિવાય કંપનીએ 43 અબજ ડોલરનું દેવું પણ લીધું છે. કંપનીના ક્લાઉડ બિઝનેસ રેવન્યૂમાં 39% અને ક્લાઉડ ઇન્ફ્રાસ્ટ્રક્ચરમાં 77%નો વાર્ષિક મોટો ઉછાળો જોવા મળ્યો છે.

રીસ્ટ્રક્ચરિંગ પાછળના ખર્ચમાં મોટો વધારો

કંપનીના વાર્ષિક અહેવાલ મુજબ, નાણાકીય વર્ષ 2026ના અંત સુધીમાં ઓરેકલ પાસે 1.41 લાખ કર્મચારીઓ હતા, જે ગયા વર્ષની સરખામણીએ 13% ઓછા છે. કંપનીના પુનર્ગઠન (Restructuring) અને છટણી સંબંધિત ખર્ચમાં પણ ભારે ઉછાળો આવ્યો છે. ગયા વર્ષે જે ખર્ચ 37.4 કરોડ ડોલર હતો, તે વધીને 1.84 અબજ ડોલર સુધી પહોંચી ગયો છે.

ખર્ચમાં કાપ અને AI પાછળ રોકાણ વચ્ચે સંતુલનનો પડકાર

આ છટણી પરથી સ્પષ્ટ થાય છે કે ઓરેકલ માટે એક તરફ AI ઇન્ફ્રાસ્ટ્રક્ચર પર મોટો ખર્ચ કરવો અને બીજી તરફ કંપનીનો એકંદર ખર્ચ નિયંત્રણમાં રાખવો—એ બંને વચ્ચે સંતુલન જાળવવું એ એક મોટો પડકાર બની રહ્યો છે. જોકે, કંપની તરફથી હાલમાં આ નવી છટણી અંગે કોઈ સત્તાવાર નિવેદન કે પુષ્ટિ આપવામાં આવી નથી.