બરવાળા પાસે સિમેન્ટ ભરેલો ટ્રક પલ્ટી મારતાં બે ભાઈઓનાં દર્દનાક મોત, ત્રણ મજૂરો ઈજા

સિમેન્ટની થેલીઓ તળે દબાયેલા શ્રમિકોને જેસીબી વડે બહાર કાઢયા

સ્પીડ બ્રેકર પર ટ્રક ચાલકે સ્ટેયરિંગ પરનો કાબૂ ગુમાવતા સર્જાયો અકસ્માત

બરવાળા - બોટાદ જિલ્લાના બરવાળા તાલુકામાં બરવાળા-ખમીદાણા રોડ પર આવેલી નવયુગ વિદ્યાલય નજીક મંગળવારે વહેલી સવારે એક ગંભીર માર્ગ અકસ્માત સર્જાયો હતો. સિમેન્ટ ભરીને જઈ રહેલા ટ્રકના ચાલકે રોડ પર આવેલા બમ્પ (સ્પીડ બ્રેકર) પરથી વાહન પરનો કાબૂ ગુમાવી દેતા ટ્રક પલ્ટી મારી ગયો હતો. આ અકસ્માતમાં બે ભાઈના મોત નિપજ્યા હતા. જ્યારે અન્ય ત્રણ મજૂરોને ઇજા પહોંચી છે.

આ બનાવની વિગત એવી છે કે, બરવાળા વિસ્તારના ખરામાં રહેતા મહીપતભાઈ ગોવિંદભાઈ મકવાણા, રમેશભાઇ હર જીભાઇ સારોલા તથા બાબુભાઈ હરજીભાઈ સારોલા તથા વિજયભાઈ ગીધાભાઈ રાઠોડ, સંજયભાઈ ગીધાભાઇ રાઠોડ એમ પાંચેય ટ્રક (નંબર જીજે-૧૨-યુ-૫૯૪૧) લઈને સિમેન્ટ ભરેલ ટ્રક ઉતારવા માટે ખમીદાણા તેમજ હેબતપુર જવા માટે બરવાળાથી નીકળી બરવાળા ખમીદાણા ગામ વચ્ચે આવેલ નેસડીયા હનુમાનજી મંદિરની બાજુમાં આવેલ નવયુગ વિધ્યાલય પાસે આશરે પોણા સાતેક વાગ્યાના અરસામાં પહોંચતા રોડ ઉપર આવેલ બમ્પને પુરઝડપે ટ્રકના ડ્રાઇવરે ઠેકાડતા ટ્રકના ડ્રાઇવરે સ્ટેરીંગ ઉપરનો કાબુ ગુમાવી દીધો હતો. ટ્રક રોડની રોંગ સાઇડમાં પલ્ટી ખાઈ ઉંધો પડી ગયેલ અને આ વખતે ટ્રક ઉંધો પડી જતા મહીપતભાઈ કેબીનમાંથી તાત્કાલિક બહાર નીકળી ગયા હતા અને ટ્રકના કેબીનમાં બેઠેલ સંજયભાઈને હાથના ભાગે તથા શરીરે ઇજાઓ થઈ હતી. ટ્રેકની કેબિન અને પાછળ બેઠેલા રમેશભાઈ હરજીભાઈ સારોલા અને બાબુભાઈ હરજીભાઈ સારોલા (બંને રહે. બરવાળા) સિમેન્ટની થેલીઓ તળે દબાઈ જતા જેસીબી વડે બહાર કાઢવામાં આવ્યા હતા. જ્યારે સંજયભાઈ, મહિલતભાઈ અને વિજયભાઈને ઇજા થતા પાંચેયને હોસ્પિટલે ખસેડવામાં આવ્યા હતા. જ્યાં બે ભાઈના મોત નિપજ્યા હતા.આ બનાવ સંદર્ભે બરવાળા પોલીસે ટ્રક ચાલક વિરૃધ્ધ ગુનો નોંધી વધુ તપાસ હાથ ધરી છે.