પાલિતાણા ડિવિઝનમાં ૩૨ લાખની વીજચોરી પકડાઈ

સતત ચોથા દિવસે પીજીવીસીએલની વીજ ચેકિંગ ડ્રાઈવ

પાંચ સબ ડિવિઝનમાં ૪૦ ટીમોનું વહેલી સવારથી ચેકિંગ ઃ ૭૨ રહેણાંકી કનેક્શનોમાં ગેરરીતિ પકડાઈ

ભાવનગર -  પીજીવીસીએલ દ્વારા આજે સતત ચોથા દિવસે વીજ ચેકિંગ ડ્રાઈવ હાથ ધરવામાં આવી હતી. જેમાં પાલિતાણા ડિવિઝનના ૭૨ કનેક્શનોમાં રૃા.૩૨ લાખની વીજચોરી પકડાતા વીજ ટીમો દ્વારા દંડાત્મક કાર્યવાહી કરવામાં આવી હતી.

પીજીવીસીએલ દ્વારા આજે સતત ચોથા દિવસે વીજ ચેકિંગ ડ્રાઈવ હાથ ધરવામાં આવી હતી. જેમાં ભાવનગર વર્તૂળ કચેરી હેઠળના પાલિતાણા ડિવિઝનના ગારિયાધાર-૧ અને ૨, ઘોડીઢાળ, પાલિતાણા ટાઉન અને તળાજા-૧ સબ ડિવિઝનમાં વીજતંત્રની ૪૦ ટીમો દ્વારા આજે વહેલી સવારથી ચેકિંગ હાથ ધરવામાં આવ્યું હતું. જેમાં પાંચેય સબ ડિવિઝનના ૨૫૪ રહેણાંકી કનેક્શનો તપાસવામાં આવ્યા હતા. જેમાંથી  ૭૨ કનેક્શનોમાં કુલ રૃા.૩૨.૧૯ લાખની વીજચોરી પકડાતા વીજ ટીમો દ્વારા દંડાત્મક કાર્યવાહી કરવામાં આવી હતી. પીજીવીસીએલની વીજ ચેકિંગ ડ્રાઈવના લીધે વીજચોરોમાં ફફડાટ ફેલાયો છે. હજુ આગામી દિવસોમાં વીજ ચેકિંગ ડ્રાઈવ યથાવત્ રહેશે તેવું સૂત્રો તરફથી જાણવા મળી રહ્યું છે.