છાણીના VMC ક્વાટર્સમાં મહિલાએ સળગતો સિલિન્ડર દાદરમાં ફેંકતા અફરાતફરી,બે જણા કૂદી પડ્યા,ચારનું રેસ્ક્યૂ

છાણી વિસ્તારમાં ગઇ રાત્રે ફ્લેટના પહેલા માળે આગ લાગતાં ભારે અફરાતફરી સર્જાઇ હતી.જીવ બચાવવા માટે બે જણા પહેલા માળેથી કૂદી પડયા હતા,જ્યારે ચાર જણાનું રેસ્ક્યૂ કરવામાં આવ્યું હતું.
વીએમસી ક્વાટર્સના પહેલા માળે કુલ ચાર ફ્લેટ આવેલા છે.જેમાં એક ફ્લેટમાં રાત્રે રસોઇ બનાવતી વખતે ગેસ સિલિન્ડર લીકેજ થતાં મહિલાએ સતર્કતા રાખી ગેસ સિલિન્ડર ફ્લેટની બહાર દાદર પર ફેંક્યો હતો.
ત્યારબાદ સ્પાર્ક થવાને કારણે સિલિન્ડરમાં આગ ભભૂકી ઉઠી હતી.આગની જ્વાળાઓ ફ્લેટની બીજા માળ સુધી ફેલાતાં લોકોમાં ભારે ગભરાટ ફેલાયો હતો અને બૂમરાણ મચતાં ટોળાં જામ્યાં હતા.આ વખતે પહેલા માળેથી પુષ્પાબેન અને કાર્તિકભાઇ કૂદી ગયા હતા.
બૂમરાણ થતાં લોકો મદદ માટે દોડી આવ્યા હતા અને ફાયર બ્રિગેડ પણ આવી જતાં પહેલા માળના અન્ય બે ફ્લેટમાંથી ચાર જણાનું રેસ્ક્યૂ કરવામાં આવ્યું હતું. સારાનસીબે બનાવને કારણે કોઇને ગંભીર જાનહાનિ થઇ નહતી અને મોટી દુર્ઘટના ટળી હતી.