પેટના ઓપરેશન બાદ તબિયત લથડી, સયાજી હોસ્પિટલમાં મહિલાનું મોત

Vadodara Sayaji Hospital : પાવીજેતપુર તાલુકાના વાવડી ગામના 52 વર્ષીય ચંપાબેન બાલુભાઈ રાઠવાનું સયાજી હોસ્પિટલમાં સારવાર દરમિયાન મોત થયું છે.
ચંપાબેનનું ગત 11 સપ્ટેમ્બરના રોજ પારુલ સેવાશ્રમ ખાતે પેટનું ઓપરેશન કરવામાં આવ્યું હતું. ઓપરેશન બાદ ઇન્ફેક્શન થતાં વધુ સારવાર માટે તેમને 29 સપ્ટેમ્બરના રોજ વડોદરાની સયાજી હોસ્પિટલમાં ખસેડવામાં આવ્યા હતા.
સયાજી હોસ્પિટલમાં ચંપાબેનને ડી યુનિટમાં દાખલ કરીને સારવાર આપવામાં આવી રહી હતી. દરમિયાન ગઈકાલે બપોરે સારવાર દરમિયાન તેમનું મોત થયું હતું. ઘટનાની જાણ થતાં રાવપુરા પોલીસે મૃતદેહના પોસ્ટમોર્ટમની કાર્યવાહી હાથ ધરી હતી. સમગ્ર મામલે કરાલી પોલીસને પણ જાણ કરવામાં આવી છે. પોસ્ટમોર્ટમ રિપોર્ટ બાદ મોતનું ચોક્કસ કારણ સ્પષ્ટ થશે.