બોટલ ચઢાવેલી હાલતમાં બાળ દર્દીને તેની માતા જાતે ઉંચકીને લઇ જતી હોવાનો વીડિયો વાયરલ

દાઝી ગયેલા બાળકને બોટલ ચઢાવેલી હાલતમાં સ્ટ્રેચરને બદલે માતા ઉંચકીને અન્ય વોર્ડમાં લઇ જતી હોવાનો સયાજી હોસ્પિટલનો વીડિયો વાયરલ થયો છે.
દાઝી ગયેલા બાળકને સારવાર માટે સયાજી હોસ્પિટલના તાત્કાલિક સારવાર વિભાગમાં લાવવામાં આવ્યું હતું. પ્રાથમિક સારવાર પછી બોટલ ચઢાવીને બાળકને બાળરોગ વિભાગમાં લઇ જવાનું હતું. બાળકને સ્ટ્રેચરમાં લઇ જવાના બદલે માતા જાતે ઉંચકીને લઇ જાય છે જ્યારે અન્ય સંબંધી બોટલ પકડીને તેની પાછળ ચાલતા જાય છે. તેનો વીડિયો સોશિયલ મીડિયામાં વાયરલ થયો છે. બે દિવસ પહેલાની ઘટનાનો વીડિયો વાયરલ થતા હોસ્પિટલના આર.એમ.ઓ. એ જણાવ્યું છે કે, દર્દીને શિફ્ટ કરવા માટે વ્હીલચેર, સ્ટ્રેચર અને ઇ વ્હીકલ પણ છે. તેવા સંજોગોમાં બાળકને શા માટે આ રીતે લઇ જવામાં આવ્યું ,તે અંગે તપાસ શરૃ કરી સ્ટાફના નિવેદનો લેવાનું શરૃ કરાયું છે. ત્યારબાદ પગલા લેવામાં આવશે.