વડોદરા: શિનોરના છાણભોઈમાં વિધવા મહિલાની તીક્ષ્ણ હથિયારના ઘા ઝીંકી હત્યા, આરોપી પ્રેમી ફરાર!

Vadodara Crime News: વડોદરા જિલ્લાના શિનોર તાલુકાના છાણભોઈ ગામે આવેલી નવીનગરી વિસ્તારમાં આજે (ચોથી ઓક્ટોબર) સવારે હત્યાની સનસનાટીભરી ઘટના સામે આવી હતી. ગામમાં એકલવાયું જીવન ગાળતાં વિધવા મહિલાની તેના જ પ્રેમીએ કોઈ અગમ્ય કારણોસર તીક્ષ્ણ હથિયાર વડે ગળા તેમજ શરીરના ભાગે ઘા ઝીંકી હત્યા કરી હતી. આ બનાવને પગલે સમગ્ર શિનોર પંથકમાં ભારે અરેરાટી સાથે ચકચાર મચી જવા પામી છે.

લોહીલુહાણ હાલતમાં મૃતદેહ મળતાં પોલીસ દોડતી થઈ

મળતી માહિતી અનુસાર, શિનોર પોલીસ સ્ટેશનને સવારે માહિતી મળી હતી કે છાણભોઈ ગામની નવીનગરીમાં એક મહિલા લોહીલુહાણ હાલતમાં મૃત પડી છે. ઘટનાની ગંભીરતાને ધ્યાને લઈ શિનોર પોલીસ સ્ટેશનના PI આર. આર. વસાવાએ તાત્કાલિક વડોદરા રૂરલ DySPને જાણ કરી હતી. જેના પગલે DySP સહિત ઉચ્ચ પોલીસ અધિકારીઓનો કાફલો તાબડતોબ બનાવ સ્થળે પહોંચી ગયો હતો.

પોલીસની પ્રાથમિક તપાસમાં મૃતક મહિલાની ઓળખ મનીષાબહેન વસાવા તરીકે થઈ છે. મૃતકના પતિનું આશરે 10 વર્ષ અગાઉ અવસાન થયું હતું. તેમને એક પુત્રી (જેના લગ્ન થઈ ચૂક્યા છે) અને એક પુત્ર જે મામાના ઘરે રહે છે, જેથી મનીષાબહેન ઘરમાં એકલાં જ રહેતાં હતાં. તપાસ દરમિયાન બહાર આવ્યું હતું કે મૃતક મહિલા છેલ્લા બે વર્ષથી ગામના જ સતીશ વસાવા નામના ઈસમ સાથે લીવ-ઈનમાં રહેતા હતા. આ દરમિયાન, કોઈ બાબતે ઉશ્કેરાઈ જઈ પ્રેમી સતીશ વસાવાએ મનીષાબહેન પર તીક્ષ્ણ હથિયાર વડે હુમલો કરી ઘટનાસ્થળે જ પતાવી દીધા હતા અને બાદમાં ત્યાંથી ફરાર થઈ ગયો હતો.

પોલીસે ગુનો નોંધી આરોપીને ઝડપવા ચક્રો ગતિમાન કર્યા

શિનોર પોલીસે મૃતક મહિલાના પુત્રની ફરિયાદના આધારે ગુનો નોંધ્યો છે અને મૃતદેહને પોસ્ટમોર્ટમ અર્થે હોસ્પિટલ ખસેડ્યો છે. ઘટના બાદથી ફરાર થઈ ગયેલા હત્યારા પ્રેમી સતીશ વસાવાને ઝડપી પાડવા પોલીસે અલગ-અલગ ટીમો બનાવી તપાસના ચક્રો ગતિમાન કર્યા છે.