કલાલીમાં ખરીદી કરવા ગયેલા ગ્રાહક પર દુકાનદારનો હુમલો

કલાલી અને હરણી વારસિયા રીંગ રોડ પર નજીવી બાબતે મારામારી થતા અટલાદરા અને વારસિયા પોલીસે ગુનો દાખલ કરી કાર્યવાહી હાથ ધરી છે.
કલાલી ખિસકોલી સર્કલ પાસે સોનલ પાર્ક સોસાયટીમાં રહેતા મુકેશકુમાર કુસ્વાહે અટલાદરા પોલીસ સ્ટેશનમાં ફરિયાદ નોંધાવી જણાવ્યું છે કે,ગત ૫ મી તારીખે હું પ્રમુખ સ્વામી કુટિર ખાતે મારા મામાના ઘરે ગયો હતો. હું અને મારા મામાનો દીકરો સાંજે સાડા સાત વાગ્યે ગુલાબી વુડાના મકાન પાસે કરિયાણાની દુકાન પર ખરીદી કરવા ગયા હતા.મારો પિતરાઇ ભાઇ દુકાનમાંથી લોટનું પેકેટ લઇને મારી પાછળ ઊભો હતો. તે દરમિયાન પાછળથી આવેલા દુકાનદાર અજય ગાયકવાડે મને પૂછ્યા વગર પેકેટ કેમ લીધું, તેવું કહીને ઝઘડો કરી લોખંડની પાઇપથી હુમલો કર્યો હતો.
જ્યારે અન્ય એક કિસ્સામાં મૂળ યુ.પી. અને હાલ હાથીખાના વિસ્તારમાં રહેતા ફ્રૂટની લારી ચલાવતા સાનમોહંમદ અનવરભાઇ પઠાણે વારસિયા પોલીસ સ્ટેશનમાં ફરિયાદ નોંધાવી જણાવ્યું છે કે, ગઇકાલે બપોરે ત્રણ વાગ્યે દિનેશ નરીયાણી તથા વિકાસ રાણા સાથે લારી મૂકવા બાબતે તકરાર થતા ઝપાઝપી થઇ હતી. દિનેશે ઉશ્કેરાઇને માથામાં કડું મારી ઇજા પહોંચાડી હતી.