તાંદળજામાં ગટર અને રસ્તાની સમસ્યાથી રહીશોને ભારે હાલાકી

તાંદળજા ગામના માળી મહોલ્લામાં ગટર અને રસ્તાની સમસ્યાને લઈને સ્થાનિક રહીશોએ આજે તંત્ર સામે નારાજગી વ્યક્ત કરી છે.

છેલ્લા એક વર્ષથી ડ્રેનેજ લાઈન ચોકઅપ થવાની સમસ્યા હોવા છતાં તંત્ર દ્વારા કાયમી ઉકેલ લાવવામાં આવતો નહીં હોવાનો રહીશોએ આક્ષેપ કર્યો છે. ફરિયાદ કરવામાં આવે ત્યારે જેટિંગ મશીન મોકલી સફાઈ કરવામાં આવે છે, પરંતુ બે દિવસ બાદ ફરી ગટર ચોકઅપ થઈ જતાં પરિસ્થિતિ યથાવત રહે છે. સ્થાનિકોએ ડ્રેનેજ નેટવર્કમાં સુધારો કરવાની માગ કરી છે.

ગણેશ પંડાલની આગળ ગટરનું પાણી ભરાતાં ગણેશ ભક્તો સહિત સ્થાનિકોને ભારે પરેશાનીનો સામનો કરવો પડી રહ્યો છે. બીજી તરફ, રસ્તો ઉબડખાબડ હોવાથી અવરજવર કરવામાં પણ લોકોને હાલાકી ભોગવવી પડી રહી છે.

સામાજિક કાર્યકરે કહ્યું કે અવારનવાર ફરિયાદો કરવા છતાં અધિકારીઓ દ્વારા સમસ્યાનો કાયમી ઉકેલ લાવવામાં આવતો નથી. અધિકારીઓ પ્રજાના કામોને બદલે કોન્ટ્રાક્ટરોને વધુ મહત્વ આપે છે. સારો રસ્તો બનાવવાના બદલે વારંવાર પેચવર્ક કરીને ભ્રષ્ટાચાર આચરે છે એમ એમનું કહેવું છે.