ઊર્મિ ચાર રસ્તા પાસે ભૂવો પડતા એક તરફનો માર્ગ બંધ

વોર્ડ નંબર ૧૨માં અકોટામાં ઊર્મિ ચાર રસ્તા પાસે મુખ્ય માર્ગ પર મોટો ભૂવો પડતા વાહનચાલકોને હાલાકીનો સામનો કરવો પડી રહ્યો છે. ઉપરથી ત્રણ ફૂટ  દેખાતો ભૂવો અંદરથી ૧૦ ફૂટ પહોળો અને ૧૦ ફૂટ ઊંડો છે.

ભૂવો પડયા બાદ કોર્પોરેશન દ્વારા સ્થળ પર બેરીકેડ મૂકી એક તરફનો માર્ગ બંધ કરાયો છે, જેના કારણે માર્ગ પર વાહન વ્યવહારને અસર થઈ રહી છે અને વાહનચાલકોને મુશ્કેલી પડી રહી છે. સામાજિક કાર્યકરે વગર વરસાદે ભૂવા પડવાની ઘટનાઓને લઈ કોર્પોરેશનની કામગીરી સામે સવાલો કર્યા છે. તેમજ વહેલીતકે ભૂવાનું સમારકામ પૂર્ણ કરી માર્ગ વાહનવ્યવહાર માટે ખુલ્લો કરવાની માગ કરાઈ છે.