આરટીઓ ખાતે એ.આઈ.ટ્રેકમાં નવી સમસ્યા

દરજીપુરા આરટીઓ ખાતે ટુ વ્હીલર એ.આઈ. (આર્ટિફિશ્યલ ઈન્ટેલિજન્સ) ડ્રાઇવિંગ ટેસ્ટ ટ્રેકમાં વરસાદી પાણીના નિકાલની યોગ્ય વ્યવસ્થા ન હોવાથી અરજદારોને મુશ્કેલીનો સામનો કરવો પડી રહ્યો છે.

વરસાદ બાદ ટ્રેકના મોટા ભાગમાં પાણી ભરાઈ રહેતા ટેસ્ટ પ્રક્રિયા પર અસર પડી રહી છે. પાણીનો ભરાવો રહેતા ટ્રેક પર લગાવવામાં આવેલા સેન્સર વાહનને યોગ્ય રીતે ડિટેક્ટ કરી શકતા નથી, જેના કારણે ટેસ્ટનું પરિણામ મળવામાં વિલંબ થાય છે.

બીજી તરફ, ફોર વ્હીલર ડ્રાઇવિંગ લાયસન્સ માટે એઆઈ ટ્રેક પર ટેસ્ટ આપવા આવતા મોટાભાગના અરજદારો પ્રથમ પ્રયાસમાં નિષ્ફળ થઈ રહ્યા છે. નવી સ્વચાલિત પરીક્ષણ પદ્ધતિમાં નાની ભૂલ પણ સીધી નોંધાતી હોવાથી અરજદારો ફેલ થઈ રહ્યા છે.

હાલ નવી વ્યવસ્થાને ધ્યાનમાં રાખીને તબક્કાવાર ટેસ્ટ માટે બોલાવવામાં આવતા અરજદારોની સંખ્યા વધારવામાં આવી રહી છે. જો ટેસ્ટ દરમિયાન કોઈ ટેકનિકલ ખામી અથવા સમસ્યા સામે આવે તો તેનું નિરાકરણ લાવી શકાય. જોકે વરસાદી મોસમમાં ટ્રેક પર પાણી ભરાવાની સમસ્યા હોવાથી એઆઈ ટ્રેકની કામગીરી સામે સવાલો ઊભા થયા છે.