મ્યુ.કોર્પોરેશનના સફાઈકર્મીઓ હાજરી પદ્ધતિથી રોષે ભરાયા

મ્યુ.કોર્પોરેશનની વોર્ડ નંબર-૩ની ઓફિસ ખાતે આજે બપોરે હાજરીની પદ્ધતિના વિરોધમાં સફાઈ કર્મચારીઓ એકત્ર થયા હતા.

સફાઈ કર્મચારીઓનું કહેવું છે કે દિવસમાં ચાર વખત હાજરી પૂરવા માટે કચેરીના ધક્કા ખાવા પડે છે. તેના કારણે સફાઈની કામગીરીનો સમય પણ વેડફાય છે. અન્ય વોર્ડની સરખામણીએ માત્ર વોર્ડ નંબર-૩માં જ આ પદ્ધતિ અમલમાં મુકાઈ હોવાનો તેમનો આક્ષેપ છે. કર્મચારીઓએ ચાર વખતની જગ્યાએ બે વખત હાજરી નોંધવાની વ્યવસ્થા કરવાની માગ કરી છે.

કર્મચારીઓએ હાજરીની નોંધણીમાં વહાલા-દવલાની નીતિ અપનાવાતી હોવાના આક્ષેપ પણ કર્યા છે. કેટલાક કર્મચારીઓ હાજરી નોંધાવ્યા બાદ અંગત કામ માટે જતા રહેતા હોવા છતાં તેમની સામે કાર્યવાહી થતી ન હોવાનો આક્ષેપ છે.

આ અંગે વોર્ડ ઓફિસરે કહ્યું કે ઓનલાઈન હાજરીના પરિપત્ર મુજબ દરેક વોર્ડમાં કર્મચારીઓએ દિવસમાં બે વખત ચેકઇન અને બે વખત ચેકઆઉટ કરવું ફરજિયાત છે.