ICC મહિલા ચેમ્પિયન્સ ટ્રોફીની મુંબઈ - વડોદરા યજમાની કરશે

આંતરરાષ્ટ્રીય ક્રિકેટ કાઉન્સિલ (આઈસીસી) દ્વારા ૨૦૨૭માં પ્રથમ વખત યોજાનારી મહિલા ચેમ્પિયન્સ ટ્રોફીનું આયોજન વડોદરાને પણ સોંપવામાં આવ્યું છે. ૧૪થી ૨૮ ફેબુ્રઆરી, ૨૦૨૭ દરમિયાન યોજાનારી આ ટૂર્નામેન્ટની મેચો વડોદરા અને મુંબઈમાં રમાશે.

અત્રેના કોટંબી સ્થિત ઇન્ટરનેશનલ ક્રિકેટ સ્ટેડિયમ અને મુંબઈનું ક્રિકેટ ક્લબ ઓફ ઇન્ડિયા આ ટૂર્નામેન્ટના યજમાન બનશે. વિશ્વની છ અગ્રણી મહિલા ક્રિકેટ ટીમોભારત, ઓસ્ટ્રેલિયા, ઇંગ્લેન્ડ, ન્યૂઝીલેન્ડ, દક્ષિણ આફ્રિકા અને શ્રીલંકા ટૂર્નામેન્ટમાં ભાગ લેશે.

આઈસીસી મહિલા ટી ૨૦ આઈ ટીમ રેન્કિંગમાં ૬ જુલાઈની ક્વોલિફિકેશન કટ-ઓફ તારીખના આધારે આ છ ટીમોએ ટૂર્નામેન્ટમાં સ્થાન મેળવ્યું છે. તમામ ટીમો રાઉન્ડ-રોબિન ફોર્મેટમાં એકબીજા સામે રમશે અને ટોચની બે ટીમો ૨૮ ફેબુ્રઆરીએ ફાઇનલમાં ટકરાશે.

આ ટૂર્નામેન્ટનું આયોજન શ્રીલંકામાં થવાનું હતું. જોકે શ્રીલંકા ક્રિકેટ બોર્ડમાં વહીવટી અને સરકારી હસ્તક્ષેપ વધતા આઈસીસીએ કડક વલણ અપનાવીને યજમાનીના અધિકારો પાછા લઈ લીધા હતા.