મકરપુરાની જાગનાથ ભોજનાલયમાંથી ગાંજો પકડાયો

મકરપુરા જીઆઇડીસીમાં આવેલા એક ભોજનાલયમાંથી પોલીસને ગાંજો મળી આવતાં તેના સંચાલકની પૂછપરછ કરવામાં આવી છે.
જીઆઇડીસીમાં ભોજનાલયની આડમાં ગાંજાનું વેચાણ ચાલતું હોવાની માહિતી મળતાં ક્રાઇમ બ્રાન્ચની ટીમે જાગનાથ ભોજનાલય ચલાવતા સુખદેવ ભાઉરાવ પનાડ(સિકોતર નગર,મકરપુરા,જીઆઇડીસી કોલોની પાછળ) ઉપર વોચ રાખી હતી.
પોલીસે ભોજનાલયમાં છાપો મારતાં ગોદડા નીચેથી પ્લાસ્ટિકની કોથળીમાંથી કુલ રૃ.૧૧ હજારની કિંમતનો ૨૧૯ ગ્રામ ગાંજો મળી આવ્યો હતો.પોલીસે ૧૬ નંગ પ્લાસ્ટિકની કોથળીઓ પણ કબજે કરી હતી.
આરોપીની પૂછપરછ દરમિયાન ગાંજાનો જથ્થો કોઇ રિક્ષાવાળો આપી જતો હોવાની વિગતો ખૂલતાં પોલીસે તે દિશામાં વધુ તપાસ હાથ ધરી છે.