ગોરવામાં વહુ પર એસિડ નાખનાર સાસુ અને હેરાન કરનાર પતિ,સસરા અને બે નણંદ સામે ગુનો

ગોરવા વિસ્તારમાં પરિણીતા સાથે કામ બાબતે બોલાચાલી કરી ઉશ્કેરાયેલી સાસુએ તેના પર એસિડ નાખી દીધું હોવાના બનેલા બનાવ અંગે સાસુ સહિતના સાસરીયા સામે પોલીસ ફરિયાદ થઇ છે.
ગોરવાના સહયોગ ગાર્ડન પાસે રહેતી પરિણીતાએ પોલીસને કહ્યું છે કે,મારા લગ્ન બાદ સાસુ કોઇને કોઇ બાબતે ઝઘડા કરતા હતા.જ્યારે પતિ પણ માતા કહે તેટલું જ કરવાનું તેમ કહેતા હતા.બે નણેદો અને પિતા પણ પતિની ઉશ્કેરણી અને ઝઘડા કરતા હતા.
પરિણીતાએ કહ્યું છે કે,ગઇ તા.૧૦મી સપ્ટેમ્બરે બપોરે સાસુએ બાથરૃમ સાફ કરવા કહ્યું હતું.હું બાથરૃમ સાફ કરવા ગઇ ત્યારે સાસુએ એસિડથી સાફ કરવા કહ્યું હતું.પરંતુ મને એસિડની એલર્જી હોવાથી મેં ના પાડી હતી.જેથી સાસુએ મારા પર એસિડ નાખતા ગળા અને મોંઢાના ભાગે ઇજા થઇ હતી. ઉપરોક્ત ફરિયાદને આધારે પોલીસે પતિ પિયુષ,સાસુ સુધા,સસરા અને નણંદ રિન્કુબેન અને વિરલબેન સામે ગુનો નોંધ્યો છે.