વેમાલીગામે વરસાદી કાંસમાં વેઠ ઉતાર્યાનો આક્ષેપ

વેમાલી ગામ ખાતે ગેલેક્સી ત્રણ રસ્તાથી વેમાલી તળાવ સુધી એક કિલોમીટર લાંબી નવી વરસાદી કાંસ નાખવામાં આવી છે. જોકે, આ કામગીરીની ગુણવત્તા અને આયોજન સામે હવે સવાલો ઉઠી રહ્યા છે.

સામાજિક કાર્યકર કમલેશ પરમારનો આક્ષેપ છે કે વરસાદી પાણીના નિકાલ માટે બનાવાયેલો કાંસ ઉપયોગી નિવડે તેવું આયોજન કરાયું નથી. રોડની વચ્ચોવચ વરસાદી કાંસ નાખવામાં આવતાં વરસાદી પાણી સરળતાથી કાંસમાં જશે નહીં અને માર્ગની બંને તરફ પાણીનો ભરાવો થશે. અધિકારીઓની આયોજન અને દેખરેખમાં રહેલી ખામીઓને કારણે આ સ્થિતિ સર્જાઈ છે. વધુમાં ઉમેર્યું કે માર્ગની વચ્ચોવચ બનાવવામાં આવેલા વરસાદી કાંસ પર લગાવવામાં આવેલા સિમેન્ટના ઢાંકણા વાહનો પસાર થવાથી તૂટવાની શરૃઆત થઈ ગઈ છે. પરિણામે હવે આ ઢાંકણા બદલવા પડશે. આવા કોન્ટ્રાક્ટરો કામગીરીમાં વેઠ ઉતારતા હોઈ અને અધિકારીઓ દ્વારા ચકાસણી વિના બિલો પાસ કરાતા ભ્રષ્ટાચારને મોકળુ મેદાન મળે છે એવો આક્ષેપ કરાયો છે.  આ મામલે આગામી દિવસોમાં સંબંધિત વિભાગ સમક્ષ રજૂઆત કરી કામગીરીની નિષ્પક્ષ તપાસની માગ કરાશે તેવું એમણે કહ્યું  છે