ગાેત્રીમાં ચાલુકારે ચાલકને ખેંચ આવતા કાર ઝાડ અને થાંભલામાં ઘૂસી ગઇ,મોટી દુર્ઘટના ટળી

ગોત્રી વિસ્તારમાં કાર ચાલકને ખેંચ આવતાં મોટી દુર્ઘટના થતાં રહી ગઇ હતી.જો કે આ બનાવમાં ચાલકને ઇજા થઇ હોવાનું જાણવા મળ્યું છે.
ગોત્રી વિસ્તારમાં વુડા સર્કલથી યશ કોમ્પ્લેક્સ જવાના રસ્તા પર આજે સાંજે એક કારચાલકને ચાલુ કારે ખેંચ આવતાં તેણે સ્ટિઅરિંગ પરનો કાબૂ ગૂમાવ્યો હતો.
આ સાથે કાર ઝાડ સાથે ભટકાતાં ઝાડનો ભાગ તૂટી ગયો હતો અને ત્યારબાદ કાર થાંભલામાં ઘૂસી ગઇ હતી.બનાવને પગલે લોકોના ટોળાં જામ્યાં હતા અને ઇજાગ્રસ્ત કાર ચાલકને બહાર કાઢવામાં આવ્યો હતો. સારાનસીબે કારની અડફેટમાં કોઇ વાહન ચાલક કે રાહદારી અડફેટમાં નહિ આવતાં જાનહાનિ થતાં રહી ગઇ હતી.રાત સુધી આ બનાવમાં કોઇ ફરિયાદ નોંધાઇ નથી.