દિવાળી-નૂતન વર્ષ 2026: ધનતેરસથી લાભ પાંચમ સુધીના શ્રેષ્ઠ મુહૂર્ત, જાણો ચોપડા અને લક્ષ્મી પૂજનનો ઉત્તમ સમય

Diwali 2026 Shubh Muhurat: દિપાવલી પર્વ (વિક્રમ સંવત 2082) અને નવા વર્ષ(વિક્રમ સંવત 2083)ના આગમનને હવે ગણતરીના દિવસો બાકી રહ્યા છે, ત્યારે જ્યોતિષાચાર્ય ડૉ. હેમીલ પી. લાઠીયાએ દિવાળી અને નવા વર્ષના શુભ મુહૂર્તોની માહિતી આપી છે. ધનતેરસથી લઈને લાભ પાંચમ સુધીની ખરીદી, ચોપડા પૂજન અને લક્ષ્મી પૂજન માટેના શ્રેષ્ઠ મુહૂર્તોની વિગતો નીચે મુજબ છે.

પુષ્ય નક્ષત્ર અને રવિ પુષ્યમૃત યોગ (1 નવેમ્બર 2026)

નવા વર્ષના ચોપડા કે અન્ય શુભ ખરીદી માટે રવિવાર, તા. 01/11/2026ના રોજ રવિ પુષ્યમૃત યોગ છે. આ દિવસે ખરીદી માટે સવારે 8:10થી 12:20 અને બપોરે 1:50થી 3:10 સુધીનો સમય શ્રેષ્ઠ રહેશે.

ધનતેરસ (6 નવેમ્બર 2026)

શુક્રવાર, તા. 06/11/2026ના રોજ ધનતેરસ (આસો વદ 13) છે. આ દિવસે ધન્વંતરિ પૂજન, સોના-ચાંદીની ખરીદી અને દીપદાન માટે બપોરે 12:25થી 01:45, સાંજે 04:40થી 05:55 અને રાત્રે 09:15થી 10:45 સુધીના મુહૂર્તો શુભ છે.

કાળી ચૌદશ (7 નવેમ્બર 2026)

શનિવાર, તા. 07/11/2026ના રોજ કાળી ચૌદશ (આસો વદ 14) નિમિત્તે પૂજા અને ઉપાસના માર્ગદર્શન મુજબ કરવામાં આવશે.

દિવાળી અને લક્ષ્મી પૂજન (8 નવેમ્બર 2026)

રવિવાર, તા. 08/11/2026ના રોજ દિવાળી પર્વ ઉજવાશે. લક્ષ્મી પૂજન અને દિપાવલી પૂજન માટે સવારે 11:30થી 12:20, બપોરે 01:50થી 03:10, સાંજે 06:00થી અને રાત્રે 10:05 સુધીના શુભ મુહૂર્તો છે.

નૂતન વર્ષ - વિ.સ. 2083 (10 નવેમ્બર 2026)

સોમવારે અમાસ પૂર્ણ થયા બાદ, મંગળવાર, તા. 10/11/2026ના રોજ નૂતન વર્ષ (વિક્રમ સંવત 2083) પ્રારંભ થશે. નવા વર્ષમાં શુભ શરૂઆત હેતુ સવારે 09:40થી બપોરે 01:40 સુધીનો સમય ઉત્તમ છે.

લાભ પાંચમ (14 નવેમ્બર 2026)

શનિવાર, તા. 14/11/2026ના રોજ કારતક સુદ 5 એટલે કે લાભ પાંચમના દિવસે નવા ધંધા-રોજગાર કે શુભ કાર્યોની શરૂઆત માટે સવારે 08:15થી 09:35 અને બપોરે 12:25થી 04:30 સુધીના મુહૂર્તો ઉપલબ્ધ રહેશે.

અમારા તમામ વાચકોને દિપાવલી પર્વ અને નૂતન વર્ષની અગાઉથી હાર્દિક શુભકામનાઓ