29 કે 30 ઓકટોબર, કરવા ચોથ ક્યારે છે? જાણો ચંદ્રમા નીકળવાનો સમય અને સાચી તિથિ

Karwa Chauth 2026: કરવા ચોથ સુહાગન મહિલાઓ માટે એક અત્યંત ખાસ પર્વ છે. આ દિવસે મહિલાઓ પતિના લાંબા આયુષ્ય, સારા સ્વાસ્થ્ય અને સુખી દામ્પત્ય જીવનની કામના સાથે નિર્જળા વ્રત રાખે છે. સવારે સરગી ગ્રહણ કર્યા બાદ વ્રતની શરૂઆત થાય છે, બપોરે કે સાંજે કથા-પૂજા કરવામાં આવે છે અને સાંજે ચંદ્રને અર્ઘ્ય અર્પણ કરીને વ્રતના પારણાં કરવામાં આવે છે. વર્ષ 2026માં કરવા ચોથની સાચી તારીખને લઈને કેટલાક લોકોમાં અસમંજસની સ્થિતિ છે. પરંતુ જ્યોતિષાચાર્યોએ પંચાંગ જોઈને સાચી તારીખ અને મુહૂર્ત સ્પષ્ટ કર્યા છે.

29 કે 30 ઑક્ટોબર: કરવા ચોથ ક્યારે છે?

જ્યોતિષાચાર્યના જણાવ્યા અનુસાર, કારતક માસના કૃષ્ણ પક્ષની ચતુર્થી તિથિ 29 ઑક્ટોબરે મોડી રાત્રે 1:06 વાગ્યે શરૂ થશે અને તે જ દિવસે રાત્રે 10:09 વાગ્યે પૂર્ણ થશે. કરવા ચોથના વ્રતમાં ચંદ્રોદય (ચંદ્ર ઉગવાના) સમયે ચતુર્થી તિથિ હોવી અત્યંત મહત્ત્વપૂર્ણ માનવામાં આવે છે. 29 ઑક્ટોબરે રાત્રે ચંદ્ર નીકળવાના સમયે ચતુર્થી તિથિ રહેશે, તેથી ભારતમાં કરવા ચોથનું વ્રત 29 ઑક્ટોબરે જ રાખવામાં આવશે.

પૂજાનું શુભ મુહૂર્ત અને ચંદ્રોદયનો સમય

કરવા ચોથની પૂજાનું શુભ મુહૂર્ત સાંજે 5:38 વાગ્યાથી 6:56 વાગ્યા સુધીનું રહેશે. આ સમયગાળા દરમિયાન મહિલાઓ ભગવાન શિવ, માતા પાર્વતી, ભગવાન ગણેશ અને કરવા માતાની આરાધના કરી શકે છે તથા વ્રતની કથા સાંભળી શકે છે. નવી દિલ્હીમાં 29 ઑક્ટોબરે રાત્રે આશરે 8:17 વાગ્યે ચંદ્રોદય થવાની શક્યતા છે. અલગ-અલગ શહેરોમાં સૂર્યાસ્ત અને ચંદ્રોદયના સમયમાં થોડો ફેરફાર હોઈ શકે છે, તેથી સ્થાનિક પંચાંગ મુજબ સમય ચકાસી લેવો હિતાવહ છે.

કરવા ચોથ વ્રતની પૂજા વિધિ અને મહત્ત્વ

કરવા ચોથના દિવસે સવારે સ્નાન કરીને વ્રતનો સંકલ્પ લેવામાં આવે છે. સાંજે પૂજાના સ્થળે માટીની વેદી બનાવીને શિવ પરિવાર અને કરવા માતાની સ્થાપના કરવામાં આવે છે. ધૂપ, દીપ, ચંદન અને સિંદૂરથી પૂજન કર્યા બાદ કથા સાંભળવામાં આવે છે. રાત્રે ચંદ્ર દર્શન કરી, અર્ઘ્ય અર્પીને વ્રતના પારણાં કરાય છે. આ પર્વમાં સાસુ અને વહુના સંબંધોનું પણ વિશેષ મહત્ત્વ હોય છે. સવારે સાસુ વહુને સરગી આપે છે, જ્યારે સાંજે પૂજા બાદ વહુ સાસુને ફળ, મીઠાઈ, ડ્રાયફ્રૂટ્સ અને ભેટ અર્પણ કરીને તેમના આશીર્વાદ લે છે.