VIDEO| અમરેલીમાં 24 કલાકમાં 2 સિંહણ કૂવામાં ખાબકી: વન વિભાગે મોડી રાતે રેસ્ક્યૂ કરી બંનેનો જીવ બચાવ્યો

Amreli Jafrabad Dhari Lioness Rescue: અમરેલી સહિતના સૌરાષ્ટ્રના ઘણાં ગ્રામ્ય વિસ્તારોમાં સિંહના આટાફેરાના વીડિયો સામે આવતા હોય છે, ત્યારે જાફરાબાદના બાબરકોટમાં કૂવામાં પડેલી સિંહણનું વનવિભાગ દ્વારા સફળ રેસ્ક્યૂ કરવામાં આવ્યું હતું. જ્યારે ધારીમાં પાણી ભરેલા કૂવામાં શિકાર સાથે સિંહણ પડી જતાં વનતંત્ર દોડતું થયું હતું. આમ, અમરેલીમાં 24 કલાકમાં બે સિંહણ કૂવામાં ખાબકતા વનવિભાગે રેસ્ક્યૂ કરીને પાંચરે પૂરી હતી.

જાફરાબાદના બાબરકોટમાં કૂવામાં પડેલી સિંહણનું સફળ રેસ્ક્યૂ

અમરેલીના જાફરાબાદના બાબરકોટમાં શિકારની શોધમાં સિંહણ પાણી પુરવઠાના ખાલી કૂવામાં ખાબકી હતી. રાત્રિના અંધારામાં સિંહણ કૂવામાં ખાબકી હોવાની જાણ થતાં સ્થાનિક વનવિભાગની ટીમ ઘટનાસ્થળે પહોંચીને રેસ્ક્યૂ ઓપરેશન હાથ ધર્યું હતું.

વનવિભાગની ટીમે રીંગ કેચ પાંજરું ઊતારીને સિંહણને બહાર કાઢવાની કામગીરી શરૂ કરી હતી. જેમાં 6 કલાકની ભારે જહેમત બાદ સિંહણ પાંજરે પૂરાઈ હતી. બાબરકોટ આસપાસ સિંહોના વસવાટથી સ્થાનિકોમાં વન્યજીવના હુમલાનો ભય રહે છે.

ધારીમાં પાણી ભરેલા કૂવામાં શિકાર સાથે સિંહણ ખાબકી

બીજી તરફ, ધારીના વીરપુરમાં પણ એક સિંહણ કૂવામાં ખાબકી હતી. વીરપુરના ભાભલુંભાઈ ધાખડાની વાડીમાં ડુક્કરના શિકાર પાછળ દોડ લગાવેલી સિંહણ અને શિકાર બંન કૂવામાં ખાબક્યા હતા. પાણી ભરેલા કૂવામાં સિંહણ ખાબકતા તાત્કાલિક વનતંત્ર ઘટનાસ્થળે પહોંચીને સિંહણને બહાર કાઢવા રેસ્ક્યૂ ઓપરેશન શરૂ કર્યું હતું. આમ, કૂવા માંથી ભારે જહેમત બાદ સિંહણને પાંજરે પૂરીને ધારી એનિમલ કેર સેન્ટર ખાતે મોકલવામાં આવી છે.