અમદાવાદના ઓઢવમાંથી 160 ગ્રામ MD ડ્રગ્સ સાથે યુવક ઝડપાયો, રાજસ્થાનથી જથ્થો લાવી છૂટક વેચવાનો હતો પ્લાન

Ahmedabad News: અમદાવાદના ઓઢવ વિસ્તારમાં એસ.પી. રિંગ રોડ બ્રિજ નજીક આવેલા માધવ એસ્ટેટના ગેટ નજીક એસ.ઓ.જી. (SOG) ક્રાઇમની ટીમે એક યુવકને 160 ગ્રામ મેફેડ્રોન (એમડી) ડ્રગ્સ સાથે ઝડપી પાડ્યો છે. જપ્ત કરાયેલા આ ડ્રગ્સની અંદાજિત કિંમત 4.80 લાખ રૂપિયા દર્શાવવામાં આવી છે.

ડ્રગ્સનો જથ્થો રાજસ્થાનથી આવ્યો હતો

મળતી માહિતી અનુસાર, એસ.ઓ.જી.ની ટીમ ઓઢવ વિસ્તારમાં પેટ્રોલિંગ કરી રહી હતી. આ દરમિયાન બાતમી મળી હતી કે વાવ-થરાદ જિલ્લાનો એક યુવક રાજસ્થાનથી ડ્રગ્સનો જથ્થો લાવીને ઓઢવ વિસ્તારમાં છૂટક વેચાણ કરવાની પેરવી કરી રહ્યો છે. આ બાતમીના આધારે પોલીસે માધવ એસ્ટેટ પાસે વોચ ગોઠવી હતી. આ દરમિયાન વસ્ત્રાલ તરફથી આવતા સર્વિસ રોડ પર શંકાસ્પદ જણાતા યુવકને અટકાવી તેની તલાશી લેતાં તેની પાસેથી ડ્રગ્સનો આ જથ્થો મળી આવ્યો હતો.

ઝડપાયેલા શખસની પૂછપરછમાં તેનું નામ સચિન સુંડાજી ચમનજી ઠાકોર (ઉં.વ. 20, રહે. નેસડા) હોવાનું સામે આવ્યું છે. પોલીસની પૂછપરછમાં જાણવા મળ્યું છે કે આ નશાકારક પદાર્થ તે રાજસ્થાનના બાડમેર ખાતે રહેતા ઓમપ્રકાશ નામના મુખ્ય સપ્લાયર પાસેથી અમદાવાદમાં વેચવા માટે લાવ્યો હતો. હાલ પોલીસે ડ્રગ્સ અને અન્ય ચીજવસ્તુઓ મળીને કુલ 5 લાખ રૂપિયાનો મુદ્દામાલ જપ્ત કર્યો છે અને ફરાર સપ્લાયર ઓમપ્રકાશ સામે ગુનો નોંધી આગળની તપાસ હાથ ધરી છે.