સાબરમતી સેન્ટ્રલ જેલમાં રક્ષાબંધનની ઉજવણી, 3000 કેદીને બહેને રાખડી બાંધી, સર્જાયા ભાવુક દૃશ્ય

Sabarmati Central Jail Raksha Bandhan Celebration : પવિત્ર રક્ષાબંધનના પર્વ નિમિત્તે અમદાવાદની સાબરમતી સેન્ટ્રલ જેલમાં અત્યંત લાગણીસભર અને ભાવુક વાતાવરણ સર્જાયું હતું. વિવિધ ગુનાઓ હેઠળ જેલમાં સજા કાપી રહેલા પોતાના ભાઈઓના કાંડે સ્નેહ અને સુરક્ષાનું પ્રતીક એવી રાખડી બાંધવા માટે બહેનો મોટી સંખ્યામાં ઉમટી પડી હતી. લાંબા સમયથી જેલની ચાર દીવાલો વચ્ચે સજા ભોગવી રહેલા ભાઈઓને જ્યારે તેમની બહેનોએ રૂબરૂ મળીને રક્ષાસૂત્ર બાંધ્યું ત્યારે બંને પક્ષે આંખોમાંથી અશ્રુ વહી નીકળ્યા હતા અને સમગ્ર જેલ પરિસર લાગણીશીલ દ્રશ્યોનું સાક્ષી બન્યું હતું.

ગુનાહિત દુનિયાનો ત્યાગ કરવાની પ્રતિજ્ઞા

બહેનોએ ભાઈઓના કાંડે રક્ષાકવચ બાંધવાની સાથે જ તેમને ભવિષ્યમાં ક્યારેય પણ કોઈ ખોટા રસ્તે ન જવાની તથા સજા પૂરી થયા બાદ નવેસરથી સન્માનજનક જીવન શરૂ કરવાની મહત્ત્વપૂર્ણ શિખામણ આપી હતી. આ ભાવુક ક્ષણે કેદી ભાઈઓએ પણ પોતાની બહેનોને વચન આપ્યું હતું કે તેઓ જેલમાંથી મુક્ત થયા પછી ગુનાહિત દુનિયાનો સંપૂર્ણપણે ત્યાગ કરશે. ભવિષ્યમાં પોતાના પરિવારજનો સાથે રહીને એક સમાજના આદર્શ અને જવાબદાર નાગરિક તરીકે જીવન વિતાવશે તેવી દ્રઢ ખાતરી આપીને તેમણે ફરી ક્યારેય ગુનો ન કરવાની ગંભીર પ્રતિજ્ઞા લીધી હતી.

જેલ પ્રશાસન દ્વારા વિશેષ વ્યવસ્થા

આ પવિત્ર પર્વની ઉજવણી શાંતિપૂર્ણ અને સુચારુ રીતે થાય તે માટે જેલ સત્તાવાળાઓ દ્વારા વિશેષ આયોજન કરવામાં આવ્યું હતું. સવારના 8 વાગ્યાથી લઈને બપોરના 3 વાગ્યા સુધી ચાલનારા આ કાર્યક્રમમાં 3000 થી વધુ કેદી ભાઈઓને તેમની બહેનોએ રાખડી બાંધી હતી. સુરક્ષા અને વ્યવસ્થાની દ્રષ્ટિએ જે લોકોએ અગાઉથી નોંધણી કરાવવી હતી માત્ર તેમને જ જેલ પરિસરમાં પ્રવેશ આપવાની સત્તાવાર મંજૂરી આપવામાં આવી હતી.

સુચારુ મુલાકાત માટે બેઠક વ્યવસ્થા

જેલ પ્રશાસન દ્વારા મુલાકાતી બહેનો અને કેદી ભાઈઓ માટે અલગ અલગ ટેબલ તથા બેઠકની સુવિધા ઊભી કરવામાં આવી હતી. જેથી કરીને દરેક ભાઈ-બહેન કોઈ પણ ખલેલ વગર એકબીજા સાથે શાંતિથી મુલાકાત કરી શકે અને પર્વની સુખદ ઉજવણી કરી શકે. જેલ સત્તાવાળાઓના આ માનવીય અભિગમ અને આયોજનના કારણે કેદીઓ અને તેમના સ્વજનોમાં ભારે સંતોષની લાગણી જોવા મળી હતી.