હવે રાજધાની, દુરંતો અને શતાબ્દીમાં પણ રેલવે પાસ પર ઊંચી શ્રેણીમાં મુસાફરી કરી શકાશે

Railway Pass Holders Can Travel in Higher Classes for a Fee: રેલવે કર્મચારીઓ, નિવૃત્ત કર્મચારીઓ અને વિધવા પાસધારકો હવે રાજધાની, દુરંતો અને શતાબ્દી જેવી પ્રીમિયમ ટ્રેનોમાં પણ પાસ પર મંજૂર શ્રેણી કરતાં ઉપરની શ્રેણીમાં મુસાફરી કરી શકશે. આ માટે તેમણે બંને શ્રેણીના ભાડા વચ્ચેનો તફાવત ચૂકવવો પડશે. રેલવે બોર્ડે 30મી ઓક્ટોબર, 2026ના રોજ આ અંગે સ્પષ્ટતા જાહેર કરી છે.

હવે પ્રીમિયમ ટ્રેનોમાં પણ લાભ મળશે

રેલવે બોર્ડના નવા આદેશ મુજબ, પ્રિવિલેજ પાસ (PP), પોસ્ટ રિટાયરમેન્ટ કોમ્પ્લિમેન્ટરી પાસ (PRCP) અને વિધવા પાસ (WP) ધારકોને આ સુવિધાનો લાભ મળશે. અત્યાર સુધી રેલવે સેવક પાસ નિયમો, 1986 હેઠળ મેલ અને એક્સપ્રેસ ટ્રેનોમાં પાસ પર મંજૂર શ્રેણી કરતાં ઊંચી શ્રેણીમાં મુસાફરી કરવા માટે ભાડાનો તફાવત ચૂકવવાની સુવિધા ઉપલબ્ધ હતી. જોકે, હવે રાજધાની, દુરંતો અને શતાબ્દી જેવી પ્રીમિયમ ટ્રેનોમાં પણ આ નિયમ લાગુ કરવામાં આવ્યો છે.

હવે રેલવે બોર્ડે સ્પષ્ટ કર્યું છે કે રેલવે સેવક પાસ નિયમો, 1986ના શેડ્યૂલ-2ના નિયમ 3(X) હેઠળ ભાડાનો તફાવત ચૂકવીને ઊંચી શ્રેણીમાં મુસાફરી કરવાની જોગવાઈ પ્રીમિયમ ટ્રેનોમાં પણ લાગુ પડે છે. એટલે કે, પાસ પર મંજૂર શ્રેણી કરતાં ઉપરની શ્રેણીમાં મુસાફરી કરવા માટે માત્ર બંને શ્રેણીના ભાડા વચ્ચેનો તફાવત ચૂકવવો પડશે.

PRS અને HRMSમાં તાત્કાલિક ફેરફાર કરાશે

નવા નિયમનો અમલ કરવા માટે રેલવે બોર્ડે સેન્ટર ફોર રેલવે ઇન્ફોર્મેશન સિસ્ટમ (CRIS)ને પેસેન્જર રિઝર્વેશન સિસ્ટમ (PRS) અને હ્યુમન રિસોર્સ મેનેજમેન્ટ સિસ્ટમ (HRMS)ના ઈ-પાસ મોડ્યુલમાં જરૂરી ફેરફારો કરવા સૂચના આપી છે. આ ફેરફારો બાદ પાસધારકો ઊંચી શ્રેણીમાં મુસાફરી માટે ઓનલાઈન અથવા રિઝર્વેશન કાઉન્ટર પર ટિકિટ બુક કરાવી શકશે.

રેલવે બોર્ડે આ નિર્ણય રેલવે મંત્રાલયના નાણાં વિભાગની સંમતિથી લીધો છે. આ સ્પષ્ટતાથી કર્મચારીઓ, નિવૃત્ત કર્મચારીઓ અને વિધવા પાસધારકોને પ્રીમિયમ ટ્રેનોમાં મુસાફરી માટે વધુ વિકલ્પ મળશે.