અમદાવાદમાં ATM કાર્ડ બદલીને છેતરપિંડી કરતી હરિયાણાની મેવાતી ગેંગ ઝડપાઈ, પોલીસે 9 ગુનાઓ ઉકેલ્યા

Mewati Gang Busted in Ahmedabad: અમદાવાદ શહેર પોલીસે છેતરપિંડીથી લોકોના એટીએમ (ATM) કાર્ડ બદલીને લાખો રૂપિયાની ઉચાપત કરતી હરિયાણાની મેવાતી ગેંગનો પર્દાફાશ કર્યો છે. નારોલ પોલીસ સ્ટેશનમાં નોંધાયેલી 1.68 લાખ રૂપિયાની છેતરપિંડીની ફરિયાદના આધારે તપાસ કરતા પોલીસે ઉત્તર પ્રદેશ અને હરિયાણાના સાગરીતોને ઝડપી પાડ્યા છે. આ ટોળકી એટીએમમાં મદદ કરવાના બહાને ચાલાકીથી કાર્ડ બદલીને અને પીનકોડ જાણીને, ખાસ કરીને વૃદ્ધો અને મહિલાઓને નિશાન બનાવતી હતી. પોલીસે ગુજરાત અને હરિયાણાના કુલ 9 જેટલા ગુનાઓ ઉકેલ્યા છે. આરોપીઓ પાસેથી જુદી-જુદી બેન્કના 146 એટીએમ કાર્ડ અને POS મશીન જપ્ત કરી કુલ 9.5 લાખ રૂપિયાના કૌભાંડનો પર્દાફાશ કરવામાં આવ્યો છે.

જાણો શું છે સમગ્ર મામલો

અમદાવાદ શહેરના નારોલ પોલીસ સ્ટેશનમાં એક ફરિયાદ નોંધાઈ હતી. જેમાં ભોગ બનનારનું એટીએમ કાર્ડ બદલાઈ ગયું હતું અને ત્યારબાદ તેમના ખાતામાંથી 1,68,000 રૂપિયાની મત્તા ઉપાડી લેવામાં આવી હતી. આ મામલે પોલીસની ટીમે અલગ-અલગ સીસીટીવીના આધારે તપાસ શરૂ કરી હતી. આ મામલે ફતેવાડીમાં રહેતા અને મૂળ ઉત્તર પ્રદેશના વાજીદ વાહિદ શેખની અટકાયત કરી હતી. તેની પૂછપરછ કરતાં સામે આવ્યું હતું કે, તે હરિયાણાના અલાવલપુરથી આવતી મેવાતી ગેંગનો સભ્ય છે.

મદદના બહાને કાર્ડ બદલી પીન કોડ જાણી લેતા

મેવાતી ગેંગમાં હરિયાણાના જ રહેવાસી યોગરાજ ઉર્ફે મહેશ કિશનલાલ જાટવ અને આસિફ સમુન મેવ નામના બે સાથીદારો સામેલ છે. જે એટીએમ કાર્ડ બદલવામાં એક્સપર્ટ છે. તે એટીએમ સેન્ટરમાં જઈને લોકોને મદદ કરવાના બહાને કે વાતચીતમાં ફસાવીને ચાલાકીથી અસલી એટીએમ કાર્ડ બદલી લેતા અને અન્ય સાથીદાર પાછળ ઊભા રહીને તેનો પીન કોડ જોઈ લેતો હતો. આ ગેંગમાં વાજીદ સરખેજ આસપાસના વિસ્તારોમાં રેકી કરીને એવા સ્થળો શોધતો જ્યાં વધુ લોકો અથવા ખાસ કરીને મહિલાઓ કે મોટી ઉંમરના લોકો આવતા હોય. આ ઉપરાંત તે ગેંગને અન્ય લોજિસ્ટિક મદદ અને માહિતી પૂરી પાડતો હતો, જેના બદલામાં તેને માત્ર થોડા ખર્ચાના પૈસા મળતા જ્યારે મુખ્ય હિસ્સો આસિફ અને યોગરાજ રાખતા હતા.

અમદાવાદ, નવસારી અને હરિયાણાના ગુનાઓ ઉકેલાયા

પોલીસની તપાસમાં નારોલ ઉપરાંત ઇસાનપુર, મણિનગર, સાબરમતી, વેજલપુરના બે અને ગાયકવાડ હવેલી તેમજ નવસારી જિલ્લાના ચીખલી પોલીસ સ્ટેશનનો એક ગુનો અને હરિયાણાનો એક ગુનો મળીને ગુજરાતના આઠ સહિત કુલ નવ ગુનાઓ નોંધાયા છે.

આરોપીઓ પાસેથી જુદી-જુદી કંપનીઓના કુલ 146 એટીએમ કાર્ડ અને ભારત પે કંપનીનું એક પીઓએસ મશીન પણ રિકવર કર્યું છે, જેના દ્વારા આરોપીઓ કાર્ડ બદલ્યા બાદ એટીએમમાંથી રોકડા પૈસા ઉપાડી લેતા અને બાકીની રકમ આ મશીનમાં સ્વાઇપ કરી પોતાના સંલગ્ન બેન્ક ખાતામાં જમા કરાવી લેતા હતા.

મોજશોખ અને જુગાર માટે આચરતા હતા ગુનો

આરોપીઓ પૈકી યોગરાજ સામે દિલ્હીમાં અને આસિફ વિરુદ્ધ યુપીમાં પણ અગાઉ ગુનાઓ નોંધાયેલા છે, તે પોતાની મોજશોખ પૂરી કરવા કે જુગાર રમવા અને ગેમિંગ એપમાં પૈસા ઉડાવવા માટે લોકોને આ રીતે છેતરતા હતા. આ ગેંગમાં યોગરાજ ફ્લોર ફેક્ટરી ચલાવે છે અને આસિફ સીલિંગ કોન્ટ્રાક્ટરનું કામ કરે છે, જ્યારે તેના આ ગુનાઈત કૃત્યમાં સંડોવાયેલા જાવેદ નામના ફરાર આરોપી તથા જેમના બેન્ક ખાતામાં પૈસા ગયા હતા તેની શોધખોળ ચાલી રહી છે.