ગાંધીનગર: સાયબર ફાઇનાન્સિયલ ફ્રોડ અંગે e-Zero FIR સેવાનો પ્રારંભ, હવે ઘરબેઠાં જ નોંધાશે પોલીસ ફરિયાદ

e-Zero FIR Service Launches: સાયબર ફાઇનાન્સિયલ ઠગાઈનો ભોગ બનતા નાગરિકોને ઝડપી, સરળ અને અસરકારક ન્યાય ઉપલબ્ધ કરાવવાના હેતુથી રાજ્ય સરકારે વધુ એક મહત્ત્વપૂર્ણ ડિજિટલ પહેલ શરૂ કરી છે. ગાંધીનગર ખાતેથી ‘સાયબર ફાઇનાન્સિયલ ફ્રોડ E-Zero FIR’ સેવાનું સત્તાવાર લોન્ચિંગ કરવામાં આવ્યું છે.

કેવી રીતે કામ કરશે નવી સિસ્ટમ?

આ નવી વ્યવસ્થાના અમલથી હવે સાયબર છેતરપિંડીનો ભોગ બનેલા નાગરિકોને પ્રાથમિક ફરિયાદ નોંધાવવા માટે પોલીસ સ્ટેશન સુધી જવાની જરૂર રહેશે નહીં.

•નાગરિકે માત્ર 1930 હેલ્પલાઇન પર પોતાની સાથે થયેલા ફ્રોડની જાણ કરવાની રહેશે.
•ફરિયાદ નોંધાવતાની સાથે જ સિસ્ટમ દ્વારા આપોઆપ e-Zero FIR જનરેટ થઈ જશે.
•આ e-Zero FIR આપોઆપ સંબંધિત પોલીસ સ્ટેશનને ટ્રાન્સફર કરી દેવામાં આવશે.

ત્યારબાદ પોલીસ અધિકારીઓ ફરિયાદીનો સંપર્ક કરીને જરૂરી વિગતો મેળવી નિયમ મુજબ આગળની FIR નોંધી તપાસ હાથ ધરશે.

નાણાં રિકવર થવાની શક્યતા વધશે

'e-Zero FIR' વ્યવસ્થાથી પીડિતોને ઘરબેઠાં જ તાત્કાલિક ફરિયાદ નોંધાવવાની સુવિધા મળશે. પરિણામે, ઘટના બન્યાના ટૂંક સમયમાં જ પોલીસ અને સાયબર ક્રાઈમ ટીમ એક્શનમાં આવશે, જેથી ફ્રોડ થયેલી રકમ હોલ્ડ કે ફ્રીઝ કરાવીને નાગરિકોના પૈસા બચાવવાની શક્યતાઓમાં મોટો વધારો થશે.

પ્રથમ કેસમાં જ ₹15.76 લાખ બચાવાયા

આ નવી સિસ્ટમનું એક સફળ ઉદાહરણ પણ સામે આવ્યું છે. અમદાવાદના એક રહેવાસી 'ડિજિટલ અરેસ્ટ'ના નામે સાયબર છેતરપિંડીનો ભોગ બન્યા હતા. આ મામલે રાજ્યની પ્રથમ e-FIR દાખલ કરવામાં આવી હતી, જેના આધારે સાયબર ક્રાઇમ વિભાગે ત્વરિત કાર્યવાહી કરીને પીડિતના 15.76 લાખ રૂપિયાથી વધુની રકમ બચાવવામાં સફળતા મેળવી છે.