ફેસબુક એડ જોઈને લાખો કમાવવાની લાલચમાં અમદાવાદના નિવૃત્ત આર્મીમેન છેતરાયા, ઠગે 46 લાખ પડાવ્યા

Cyber Crime Ahmedabad : અમદાવાદ શહેરમાં રહેતા અને લશ્કરી ઇજનેરી સેવા (MES)માં ઇલેક્ટ્રિશિયન તરીકે ફરજ બજાવતા 48 વર્ષીય નિવૃત્ત આર્મીમેન જનકસિંહ સબળસિંહ ઝાલા સાથે રૂ. 46,92,621.80 ની મોટી સાઇબર છેતરપિંડી આચરવામાં આવી હતી. ફેસબુક પર 'Quantum AI' નામની એક આકર્ષક 'જાહેર ખબર' જોઈને માત્ર રૂ. 22,000નું પ્રાથમિક રોકાણ કરીને દર મહિને રૂ. 3,50,000 જેટલી મબલખ આવક મેળવવાની લાલચ આપવામાં આવી હતી. આ 'જાહેર ખબર' પર ક્લિક કરીને પોતાની વિગતો ભર્યા બાદ ગઠિયાઓએ નિવૃત્ત સૈનિકને પોતાની જાળમાં ફસાવી લીધા હતા.

ફેક વેબસાઇટ અને એકાઉન્ટ મેનેજર બનીને ઠગાઇ આચરી

પોતાની વિગતો આપ્યા બાદ જનકસિંહને સત્યાકુમાર, નાદીર અને સબુર નામના શખ્સોએ ફોન કરીને સંપર્ક કર્યો હતો. આ ઠગોએ પોતાને નિષ્ણાત એકાઉન્ટ મેનેજર ગણાવીને bxbmarkets.com નામની બોગસ ફેક વેબસાઇટ પર રજિસ્ટ્રેશન કરાવ્યું હતું. ત્યારબાદ સોનું, ચાંદી અને ક્રૂડ ઓઇલ જેવી વિવિધ કોમોડિટીઝમાં ઓનલાઇન ટ્રેડિંગ કરવાની ટીપ્સ આપીને તેમનો વિશ્વાસ કેળવ્યો હતો. શરૂઆતમાં વેબસાઇટ પર ખોટો નફો દર્શાવીને ગઠિયાઓએ યુપીઆઇ (UPI) તેમજ આરટીજીએસ (RTGS) મારફતે અલગ-અલગ બેંક ખાતાઓમાં કુલ રૂ. 70,82,571.80 ની રકમ ટ્રાન્સફર કરાવી લીધી હતી.

સાઇબર ક્રાઇમ હેલ્પલાઇન 1930 પર કાયદાકીય ફરિયાદ નોંધાઈ

મોટી રકમ એકઠી થઈ ગયા બાદ ફેક વેબસાઇટ પર અચાનક નફાની જગ્યાએ સતત મોટું નુકસાન દર્શાવવાનું શરૂ કરાયું હતું. આથી જનકસિંહે પોતાના રોકાણ કરેલા નાણાં પાછા મેળવવાનો પ્રયાસ કર્યો હતો. જોકે આરોપીઓએ માત્ર રૂ. 23,89,950 પરત કર્યા હતા અને બાકીના રૂ. 46,92,621.80 પાછા આપવાનો ઇનકાર કરી દીધો હતો. વધુ રોકાણ કરશો તો જ નાણાં મળશે તેવું કહેતાં આ છેતરપિંડીનું મહત્ત્વ જાણીને તેમણે સાઇબર ક્રાઇમ હેલ્પલાઇન 1930 પર સંપર્ક કરી ફરિયાદ નોંધાવી છે. પોલીસે આ મામલે કાયદાકીય કાનૂની તપાસ લંબાવી છે.