VIDEO| અમદાવાદ-મુંબઈ બુલેટ ટ્રેન પ્રોજેક્ટ: સાબરમતી નદી પર 12 માળની ઇમારત જેટલો ઊંચો 480 મીટર લાંબો પુલ તૈયાર
Summarized by AI; it may make mistakes. Check important info
Summarized by AI; it may make mistakes. Check important info
Ahmedabad Mumbai Bullet Train Project: અમદાવાદ-મુંબઈ હાઈ-સ્પીડ રેલ(બુલેટ ટ્રેન) કોરિડોર પ્રોજેક્ટમાં વધુ એક મહત્વપૂર્ણ સિદ્ધિ હાંસલ થઈ છે. અમદાવાદમાં સાબરમતી નદી પર 480 મીટર લાંબા પુલનું નિર્માણ કાર્ય સફળતાપૂર્વક પૂર્ણ કરી લેવામાં આવ્યું છે. આ પુલ સાબરમતી અને અમદાવાદ બુલેટ ટ્રેન સ્ટેશન વચ્ચે સ્થિત છે, જે સાબરમતી સ્ટેશનથી આશરે 1 કિમી અને અમદાવાદ સ્ટેશનથી 4 કિમીના અંતરે આવેલો છે.
12 માળની ઇમારત જેટલી ઊંચાઈ
લગભગ 36 મીટર (આશરે 118 ફૂટ) ઊંચો આ પુલ 12 માળની ઇમારત જેટલો ઊંચો છે, જે અમદાવાદમાં બુલેટ ટ્રેન કોરિડોરના મુખ્ય માળખાકીય કામો પૈકીનો એક છે. આ પુલ પશ્ચિમ રેલવેની અમદાવાદ-દિલ્હી મુખ્ય રેલ લાઇન નજીક જમીન સ્તરથી આશરે 14.8 મીટરની ઊંચાઈ પરથી પસાર થાય છે.
અમદાવાદમાં બુલેટ ટ્રેનનો રૂટ ફ્લાયઓવર, પુલ, રેલવે લાઇન અને મેટ્રો કોરિડોર જેવા હાલના ઈન્ફ્રાસ્ટ્રક્ચર પરથી પસાર થતો હોવાથી નિયત વર્ટિકલ ક્લિયરન્સ જાળવવા માટે આ પુલના પિયર્સ (થાંભલા) સામાન્ય કરતાં વધુ ઊંચા રાખવામાં આવ્યા છે.
જળપ્રવાહને નડતર ન થાય તેવું એન્જિનિયરિંગ
આ પુલમાં 6 થી 6.5 મીટર વ્યાસ ધરાવતા કુલ 8 ગોળાકાર (સર્ક્યુલર) પિયર્સ બનાવવામાં આવ્યા છે.
- 04 પિયર્સ નદીના પટમાં
- 02 પિયર્સ નદીના બંને કાંઠે (પ્રત્યેક બાજુ 01)
- 02 પિયર્સ નદીના કાંઠાની બહાર સ્થાપિત
થાંભલાઓની આ વિશિષ્ટ સ્થિતિને લીધે સાબરમતી નદીના જળપ્રવાહમાં લઘુત્તમ અવરોધ ઊભો થાય તે સુનિશ્ચિત કરવામાં આવ્યું છે.
લાંબા સ્પૅન અને 'બેલેન્સ્ડ કેન્ટિલિવર મેથડ'નો ઉપયોગ
બુલેટ ટ્રેન પ્રોજેક્ટના મોટાભાગના નદી પુલોમાં આશરે 40 મીટરના નાના સ્પૅન હોય છે, જ્યારે સાબરમતી નદીના પુલમાં 50 થી 76 મીટર સુધીના લાંબા સ્પૅન તૈયાર કરવામાં આવ્યા છે. લાંબા સ્પૅનને લીધે નદીના પટમાં પિયર્સની સંખ્યા ઘટાડી શકાઈ છે.
- આ પુલમાં 76 મીટરના 5 સ્પૅન અને 50 મીટરના 2 સ્પૅન સામેલ છે.
- દરેક સ્પૅનમાં 23 સેગમેન્ટ છે, જેનું નિર્માણ સ્થળ પર જ 'ઈન-સિટુ કાસ્ટ' કરવામાં આવ્યું હતું.
- પુલનું નિર્માણ અત્યાધુનિક 'બેલેન્સ્ડ કેન્ટિલિવર મેથડ' (Balanced Cantilever Method) દ્વારા કરવામાં આવ્યું છે. આ પદ્ધતિમાં નદીમાં પરંપરાગત સ્કેફોલ્ડિંગ વગર પિયર્સથી બંને બાજુ સંતુલિત રીતે સેગમેન્ટ જોડીને પોસ્ટ-ટેન્શનિંગ દ્વારા મજબૂત બ્રિજ ડેક તૈયાર કરવામાં આવે છે.
ગુજરાતમાં 21માંથી 18 નદી પુલનું કામ સંપન્ન
મુંબઈ-અમદાવાદ બુલેટ ટ્રેન કોરિડોરમાં કુલ 25 નદી પુલોનું નિર્માણ થવાનું છે, જે પૈકી 21 પુલ ગુજરાતમાં અને 4 મહારાષ્ટ્રમાં આવેલા છે. સાબરમતી નદી પરના આ પુલના નિર્માણ સાથે હવે ગુજરાતમાં આયોજિત 21 પૈકી 18 નદી પુલોનું કામ સફળતાપૂર્વક પૂર્ણ થઈ ચૂક્યું છે.
