અમદાવાદ: 36 હજાર રૂપિયાના લાંચ કેસમાં ચીફ ફાયર ઓફિસર અમિત ડોંગરે સસ્પેન્ડ

Ahmedabad Bribery Case: અમદાવાદ મ્યુનિસિપલ કોર્પોરેશનના ફાયર વિભાગમાં વ્યાપ્ત ભ્રષ્ટાચાર સામે એન્ટી કરપ્શન બ્યુરો (ACB)એ મોટી કાર્યવાહી હાથ ધરી છે. 36 હજાર રૂપિયાની લાંચ લેતા રંગે હાથે ઝડપાયેલા ચીફ ફાયર ઓફિસર અમિતકુમાર આનંદરાવ ડોંગરેને મ્યુનિસિપલ કમિશનર દ્વારા તાત્કાલિક અસરથી સસ્પેન્ડ કરી દેવામાં આવ્યા છે.

ચીફ ફાયર ઓફિસર અમીત અને વચેટિયાના 4 દિવસના રિમાન્ડ મંજૂર

લાંચ લેતા ઝડપાયેલા ચીફ ફાયર ઓફિસર અમીતકુમાર આનંદરાવ ડોંગરે અને વચેટિયો ભાવસિંહ ઝાલાને એસીબી કોર્ટના ખાસ જજે 12 ઓગષ્ટ સુધી 4 દિવસના પોલીસ રિમાન્ડ પર સોંપવા આદેશ કર્યો છે. સમગ્ર કેસ મામલે એસીબીના પોલીસ ઇન્સ્પેકટર ડી.બી.વાળાએ બંને આરોપીઓને કોર્ટમાં રજૂ કરી 7 દિવસના રિમાન્ડની માંગણી કરી હતી. આરોપીઓના પોલીસ રિમાન્ડ માટે સરકારી વકીલ નવિન ચૌહાણે રજૂઆત કરી હતી કે, ચાંદખેડામાં રહેતા અને ફાયર સેફ્ટી ઓફિસર તરીકે કામ કરતા ફરિયાદી સશીન કાયસ્થ 6 બિલ્ડીંગોની ફાયર એન.ઓ.સી. માટે રૂ.6 હજાર લેખે 6 એન.ઓ.સી.ના રૂ.36 હજાર મંજૂર કરવા માટે લાંચ માંગી હતી. જેમાં એસીબીએ છટકું ગોઠવી આરોપીને લાંચના રૂપિયા સાથે રંગેહાથ ઝડપી લીધો હતો અને તેના ફોન દ્વારા આરોપી ચીફ ફાયર ઓફિસર અમીતકુમાર સાથે હેતુલક્ષી વાતચીત કરતા લાંચની રકમ સ્વીકારવાની સંમતિ આપી હતી. સમગ્ર મામલે એસીબીએ બંનેને ઝડપી કોર્ટમાં રિમાન્ડની માગ કરી હતી. જેમાં કોર્ટે બંને પક્ષકારોને સાંભળીને આરોપીઓના 4 દિવસના રિમાન્ડ મંજૂર કર્યા હતા.

મળતી માહિતી અનુસાર, એક જાગૃત નાગરિક પાસે લાંચની માંગણી કરવામાં આવી હતી, જે અંગે તેમણે એસીબીનો સંપર્ક કર્યો હતો. ફરિયાદના આધારે વડોદરા એસીબીની ટીમે અમદાવાદના મેમનગર સ્થિત વિજય ચાર રસ્તા પાસે સફળ ટ્રેપ ગોઠવી હતી. આ છટકામાં ચીફ ફાયર ઓફિસર અમિત ડોંગરે અને તેનો વચેટિયો ભાવસિંહ ઝાલા 36 હજાર રૂપિયાની લાંચ સ્વીકારતા રંગેહાથ ઝડપાઈ ગયા હતા.

ACBની ટીમ દ્વારા બંને આરોપીઓની અટકાયત કરીને કાયદેસરની કાર્યવાહી હાથ ધરવામાં આવી છે. ફાયર વિભાગના ઉચ્ચ અધિકારી સામેની આ સખત કાર્યવાહીથી મ્યુનિસિપલ કોર્પોરેશન અને અન્ય વિભાગોના ભ્રષ્ટ કર્મચારીઓ તથા અધિકારીઓમાં ભારે ફફડાટ વ્યાપી ગયો છે.