અમદાવાદની શૉકિંગ ઘટના, કિશોરીની 12 યુવકો સાથે વર્ચ્યુઅલ ફ્રેન્ડશીપ પકડાતા પરિવાર સંકટમાં ફસાયું, 181 અભયમની મદદ લેવી પડી

Ahmedabad News: અમદાવાદ શહેરના એક પોશ વિસ્તારમાં રહેતા ડોક્ટર પરિવારમાં અડધી રાત્રે એક ચોંકાવનારી ઘટના સામે આવી છે. જેમાં 17 વર્ષની સગીર દીકરી પોતાના રૂમમાં એકલી રહીને સોશિયલ મીડિયા પર 12 જેટલા પુરુષો સાથે ઓનલાઈન સંબંધો નિભાવી રહી હતી અને પોતાના પ્રાઈવેટ ફોટો પણ શેર કરી રહી હતી. આ બાબતે માતા-પિતા અને દીકરી વચ્ચે ભારે હોબાળો મચી ગયો હતો. સ્થિતિ એટલી વણસી ગઈ હતી કે આખરે સાયબર ક્રાઈમ કે શોષણનો ભોગ બનતા અટકાવવા માટે ગુજરાતની '181 અભયમ' મહિલા હેલ્પલાઈનની તાત્કાલિક મદદ લેવી પડી હતી.

પોશ વિસ્તારમાં રહેતા ડોક્ટર પિતાને દીકરીના વર્તન પર શંકા ગઈ

સ્થાનિક ડોક્ટરના પરિવારમાં છેલ્લા કેટલાક અઠવાડિયાથી દીકરીના વર્તનમાં મોટો બદલાવ જોવા મળ્યો હતો. પહેલા પરિવાર સાથે ભળીને રહેતી આ સગીરા ધીમે ધીમે ઘરના સભ્યોથી દૂર થવા લાગી હતી અને દિવસ-રાત પોતાના રૂમનો દરવાજો બંધ રાખીને કલાકો વિતાવતી હતી. દીકરી અવારનવાર એકાંતમાં પોતાના સેલ્ફી પાડતી પકડાઈ જતાં પિતાની શંકા વધુ દ્રઢ બની હતી. કંઈક ગરબડ હોવાની ચિંતામાં, એક મોડી રાત્રે જ્યારે દીકરી ઊંઘમાં હતી ત્યારે પિતાએ તેના રૂમમાં જઈને અંગૂઠાની છાપ (થમપ્રિન્ટ)થી તેનો સ્માર્ટફોન અનલોક કર્યો અને સોશિયલ મીડિયા એપ્સ તપાસવાનું શરૂ કર્યું.

WhatsApp, Instagram અને Facebook પરથી ખોલ્યા 12 સંબંધોના રાઝ

પિતાએ જ્યારે દીકરીનો ફોન તપાસ્યો ત્યારે WhatsApp, Instagram અને Facebook પરથી જે વિગતો સામે આવી તેનાથી પરિવારના પગ નીચેથી જમીન સરકી ગઈ. સગીરા ઓનલાઈન મળેલા 12 જેટલા જુદા જુદા પુરુષો સાથે અંગત અને ચેટિંગવાળા સંબંધોમાં હતી. આટલું જ નહીં, તેણે પોતાના રૂમમાં પાડેલા પ્રાઈવેટ ફોટો પણ આ અજાણ્યા પુરુષોને મોકલ્યા હતા.

ઘરમાં રાત્રે જ ભયાનક ઝઘડો થયો, અભયમની ટીમ બોલાવાઈ

રાત્રે જ માતા-પિતાએ દીકરીને ઉઠાડીને આ બાબતે જવાબ માંગતા ઘરમાં ભારે હોબાળો મચી ગયો હતો. પોતાની ભૂલ સ્વીકારવાના બદલે દીકરી અત્યંત ગુસ્સે થઈ ગઈ હતી અને 'આ મારી લાઈફ છે' તેમ કહીને પોતાની મરજી મુજબ જીવવાનો હક હોવાનું કહીને પિતા સાથે બહેસ કરવા લાગી હતી. ઝઘડો ખૂબ વધી જતાં અને દીકરી કઈ પણ સાંભળવા તૈયાર ન હોવાથી ગભરાયેલી માતાએ પરિસ્થિતિ કાબૂમાં લેવા માટે તાત્કાલિક '181 અભયમ' હેલ્પલાઈન પર કૉલ કરીને મદદ માંગી હતી.

અભયમ ટીમનું 4 કલાકનું કાઉન્સિલિંગ અને સમજાવટ

કૉલ મળતા જ 181 અભયમની ઈમરજન્સી ટીમ તાત્કાલિક આ હાઈપ્રોફાઈલ ઘરે પહોંચી ગઈ હતી. પરિસ્થિતિની ગંભીરતા સમજીને કાઉન્સિલર્સે પહેલા પરિવારના સભ્યોને અલગ કર્યા જેથી વાતાવરણ શાંત થઈ શકે અને ત્યારબાદ સગીરા સાથે એકાંતમાં વાતચીત શરૂ કરી હતી. સતત 4 કલાક ચાલેલા આ સેશનમાં ટીમે સગીરા પર કોઈ દોષારોપણ કરવાને બદલે તેનો વિશ્વાસ જીતવાનો પ્રયાસ કર્યો હતો. કાઉન્સિલર્સે તેને અજાણ્યા લોકો સાથે પ્રાઈવેટ ફોટો શેર કરવાના પરિણામો અને સાયબર ક્રાઈમના જોખમો વિશે સરળ ભાષામાં સમજાવ્યું હતું:

ડીપફેકનો ભય: આર્ટિફિશિયલ ઇન્ટેલિજન્સ (AI) ટેકનોલોજી દ્વારા ખાનગી ફોટોનો ઉપયોગ કરીને કેવા ખોટા/અશ્લીલ ફોટો બનાવી શકાય છે.

બ્લેકમેઇલિંગ અને તોડ: ઓનલાઈન ફસાવીને કેવી રીતે બાદમાં પૈસા કે માનસિક શોષણ માટે ધમકીઓ આપવામાં આવે છે.

ડીજીટલ ફૂટપ્રિન્ટ: ઈન્ટરનેટ પર એકવાર શેર કરેલી અંગત માહિતી કે ફોટો કાયમ માટે રહી જાય છે તેનાથી ભવિષ્યમાં થતા કાનૂની અને સુરક્ષા સંબંધિત ખતરા.

દીકરીને ભૂલનું ભાન થયું, પરિવારને મળી નવી દિશા

અભયમ ટીમની વૈજ્ઞાનિક અને પ્રેક્ટિકલ સમજાવટ બાદ સગીરાને પોતાની ભૂલ અને પોતે કેટલા મોટા જોખમમાં હતી તેનો અહેસાસ થયો હતો. તેણે સોશિયલ મીડિયાના જોખમોને સ્વીકાર્યા હતા. અભયમની ટીમે જતી વખતે પરિવારને ભવિષ્ય માટે મહત્ત્વપૂર્ણ સલાહ આપી હતી. તેમણે દીકરીને પોતાનું ધ્યાન અભ્યાસ અને લક્ષ્ય તરફ કેન્દ્રિત કરવા સમજાવી હતી, જ્યારે માતા-પિતાને ઘરનું વાતાવરણ ખુલ્લું અને સપોર્ટિવ રાખવા કહ્યું હતું જેથી એકલતા અનુભવીને દીકરી ભવિષ્યમાં ફરીથી ઓનલાઈન દુનિયાની જાળમાં ન ફસાય.