ગાંધીનગર,તા.30 નવેમ્બર 2020, સોમવાર

દિવાળી બાદ શરૂ થયેલું નવું વર્ષ જાણે કોરોના માટે જ હોય તેમ લાગી રહ્યું છે સતત કેસ વધવા ઉપરાંત હોસ્પિટલોમાં આરોગ્યની સેવાઓ કથળતા પોઝિટિવ દર્દીના મોતની સંખ્યા પણ વધી રહી છે. છેલ્લા ચાર દિવસથી ગાંધીનગર શહેર તથા જિલ્લાના સાત-સાત પોઝિટિવ દર્દીઓના મોત નિપજી રહ્યા છે.

તા.૨૭થી તા.૩૦મી સુધીના ચાર દિવસ દરમિયાન ગાંધીનગરના ૨૮ પોઝિટિવ દર્દીઓના મોત નિપજ્યા છે. જેમાં સોમવારે ૨૪ કલાકમાં વધુ સાત પોઝિટિવ વૃધ્ધ દર્દીઓના મોતનો પણ સમાવેશ થાય છે. તો બીજીબાજુ ગાંધીનગરમાં સતત બીજા દિવસે પોઝિટિવ કરતા ડિસ્ચાર્જ દર્દીઓની સંખ્યા વધી રહી છે. શહેર-જિલ્લામાં ૫૪ નવા કેસ ઉમેરાયા છે તો બીજીબાજુ ૫૭ દર્દીઓને કોરોનામુક્ત જાહેર કરવામાં આવ્યો છે. 

ગાંધીનગરમાં કોરોના પોઝિટિવ દર્દીઓના મોતનો સિલસિલો ચિંતાજનકરીતે આગળ વધી રહ્યો છે ગાંધીનગર શહેર તથા જિલ્લાના દરરોજ સાત સાત કોરોના પોઝિટિવ દર્દીઓના મોત નિપજી રહ્યા છે જો કે, સરકારી ચોપડે એક પણ કોવિડ ડેથ ગવામાં આવતું નથી તે જુદી બાબત છે પરંતું ગાંધીનગરની સિવિલ ઉપરાંત ખાનગી હોસ્પિટલોના આંકડા ઉપર નજર કરીએ તો હોસ્પિટલોમાં શબવાહિની વધારવી પડે તેવી સ્થિતિ આવી ગઇ છે.

છેલ્લા ચાર દિવસમાં ૨૮ પોઝિટિવ દર્દીના મોત નિપજ્યા છે. સોમવારે ૨૪ કલાક દરમિયાન શહેર અને જિલ્લામાંથી નવા ૫૪ પોઝિટિવ દર્દીઓ મળી આવ્યા છે. જ્યારે ૫૭ દર્દીઓને ડીસ્ચાર્જ કરવામાં આવ્યા છે.