સુરતના ડુમસમાં બર્થડે પાર્ટીમાં દારૂની મહેફિલ પર પોલીસના દરોડો, 8 મહિલાઓ સહિત 20થી વધુ ઝડપાયા

Surat Birthday Party Raid: સુરતના ડુમસ વિસ્તારમાં આવેલ એક ફાર્મ હાઉસમાં 14મી ઓગસ્ટની મોડી રાત્રે ચાલી રહેલી જન્મદિવસની હાઇપ્રોફાઇલ દારૂની મહેફિલ પર પોલીસે દરોડો પાડી મોટી કાર્યવાહી કરી છે. આ કાર્યવાહી દરમિયાન દારૂની મહેફિલ માણી રહેલી 8 મહિલાઓ સહિત 20થી વધુ લોકોની પોલીસે અટકાયત કરી છે.

જશ્ન વિલા ફાર્મ હાઉસમાં જામી હતી પાર્ટી

મળતી માહિતી મુજબ, ડુમસ સ્થિત બાપુજીની વાડી વિસ્તારમાં આવેલા ‘જશ્ન વિલા 12-એ’ ફાર્મ હાઉસમાં એક યુવતીનો બર્થ ડે સેલિબ્રેટ કરવા માટે આ હાઇપ્રોફાઇલ પાર્ટીનું આયોજન કરવામાં આવ્યું હતું. આ પાર્ટીમાં યુવક-યુવતીઓ મોંઘીદાટ લક્ઝરી ગાડીઓમાં આવ્યા હતા અને ફાર્મ હાઉસમાં વિદેશી દારૂની બોટલો સાથે જોરશોરથી સેલિબ્રેશન ચાલી રહ્યું હતું.

દરોડા દરમિયાન એવું પણ સામે આવ્યું હતું કે ફાર્મ હાઉસની બહાર દારૂની ખાલી અને ભરેલી બોટલોને સળગાવીને પુરાવાનો નાશ કરવાનો પ્રયાસ કરાયો હતો. જોકે, ડુમસ પોલીસે ઘટનાસ્થળેથી દારૂ, બિયરનો જથ્થો તેમજ લક્ઝરી વાહનો મળીને કુલ રૂપિયા ૩૫ લાખથી વધુનો મુદ્દામાલ જપ્ત કર્યો છે.

પોલીસે અટકાયત કરાયેલા તમામ 20થી વધુ શખ્સોને મેડિકલ તપાસ અર્થે સુરતની નવી સિવિલ હોસ્પિટલ ખાતે ખસેડી આગળની કાયદેસરની કાર્યવાહી હાથ ધરી છે.