‘બાપ્પા, કોઈ ભૂલ થઈ હોય તો માફ કરજો’ : સુરતના ફૂલપાડામાં વિસર્જન પહેલાં શ્રીજી પાસે ભક્તોએ કાન પકડી ઉઠક-બેઠક કરી માફી માગી

Surat Ganesh Visarjan : દસ દિવસ સુધી ભક્તિભાવ અને હર્ષોલ્લાસ સાથે શ્રીજીની પૂજા-અર્ચના કર્યા બાદ આજે સુરતીઓ પોતાના લાડલા બાપ્પાને ભારે હૈયે વિદાય આપશે. વિસર્જન પહેલાં અનેક ભક્તોમાં ‘બાપ્પા આવતા વર્ષે વહેલા આવજો’ની લાગણી જોવા મળી રહી છે, ત્યારે ફુલપાડાના ગુપ્તેશ્વર યુવક મંડળે શ્રીજીને વિદાય આપતાં પહેલાં અનોખી રીતે માફી માગી હતી. દસ દિવસની પૂજા-અર્ચના દરમિયાન જાણ્યે-અજાણ્યે કોઈ ભૂલ થઈ હોય તો માફ કરી દેવા પ્રાર્થના કરી યુવકોએ શ્રીજીની પ્રતિમા સામે કાન પકડી ઉઠક-બેઠક કરી હતી. ત્યારબાદ ઢોલ-નગારાના તાલે ગણપતિ બાપ્પા મોરિયાના નાદ સાથે શ્રીજીને વિદાય આપવામાં આવી હતી. બાપ્પાની વિદાયની આ ક્ષણોમાં ભક્તિ સાથે લાગણી અને આંખોમાં ભીનાશનો માહોલ જોવા મળ્યો હતો.
દસ દિવસ સુધી ભક્તિભાવ અને હર્ષોલ્લાસ સાથે શ્રીજીની પૂજા-અર્ચના કર્યા બાદ આજે ગણેશ વિસર્જનનો દિવસ છે. સુરત શહેરમાં વિવિધ મંડળો અને સોસાયટીઓ દ્વારા શ્રીજીની વિસર્જન યાત્રા કાઢવામાં આવશે. દસ દિવસ સુધી જે બાપ્પાની આરતી અને જયઘોષથી વાતાવરણ ગુંજી ઊઠ્યું હતું, એ જ બાપ્પાને આજે ભક્તો ભારે હૈયે વિદાય આપશે.
વિસર્જન પહેલાં ભક્તોમાં શ્રીજી પ્રત્યેની લાગણીના વિવિધ રંગો જોવા મળી રહ્યા છે. ફુલપાડાના ગુપ્તેશ્વર યુવક મંડળ દ્વારા પણ શ્રીજીને વિદાય આપતા પહેલાં અનોખી રીતે માફી માગવામાં આવી હતી. યુવક મંડળના સભ્યોએ દસ દિવસની પૂજા-અર્ચના દરમિયાન જાણ્યે-અજાણ્યે કોઈ ભૂલ થઈ હોય તો બાપ્પા માફ કરી દે તેવી ભાવના સાથે શ્રીજી સમક્ષ પ્રાર્થના કરી હતી.
આ પ્રસંગે યુવકોએ શ્રીજીની પ્રતિમા સામે કાન પકડી ઉઠક-બેઠક કરી હતી અને ‘બાપ્પા, કોઈ ભૂલ થઈ હોય તો માફ કરજો’ની ભાવના વ્યક્ત કરી હતી. બાપ્પાની સેવા અને પૂજા દરમિયાન થયેલી નાની-મોટી ભૂલો માટે ક્ષમા માગતી આ ક્ષણ ભાવુક બની હતી. શ્રીજીની પ્રતિમા સામે યુવકોની આ ભાવભીની પ્રાર્થના જોઈ ઉપસ્થિત ભક્તોમાં પણ લાગણી છલકાઈ હતી.
દસ દિવસ દરમિયાન બાપ્પાની આરતી, પૂજા અને ભક્તિમાં લીન રહેલા ભક્તો માટે વિસર્જનની ક્ષણ હંમેશા ભાવુક હોય છે. એક તરફ શ્રીજીને વિદાય આપવાનો વિરહ તો બીજી તરફ આવતા વર્ષે ફરી બાપ્પાના આગમનની આશા સાથે ભક્તો વિસર્જન યાત્રામાં જોડાયા હતા.
ફુલપાડાના ગુપ્તેશ્વર યુવક મંડળ દ્વારા શ્રીજીને વિદાય આપતી વખતે ઢોલ-નગારાના તાલે ભક્તિભાવપૂર્વક વિસર્જન યાત્રા કાઢવામાં આવી હતી. ‘ગણપતિ બાપ્પા મોરિયા’ના નાદ વચ્ચે શ્રીજીને વિદાય આપવામાં આવી હતી. દસ દિવસની ભક્તિ બાદ બાપ્પાને વિદાય આપતી વેળાએ ભક્તોની આંખોમાં લાગણી અને મનમાં આવતા વર્ષે બાપ્પાના વહેલા આગમનની પ્રાર્થના જોવા મળી હતી.