વૈભવ સૂર્યવંશી આજે ડેબ્યુ કરશે? નેટ પ્રેક્ટિસ વખતે કરી વિસ્ફોટક બેટિંગ, VIDEO વાયરલ

India vs England T20I 2026 : ભારત અને ઈંગ્લેન્ડ વચ્ચે 5 મેચની T20 સીરીઝનો પહેલો મુકાબલો આજે ચેસ્ટર-લે-સ્ટ્રીટમાં રમાશે. આ મેચ શરૂ થાય તે પહેલાં ભારતના 15 વર્ષના યુવા બેટ્સમેન વૈભવ સૂર્યવંશીનો નેટ્સમાં બેટિંગ કરતો એક વીડિયો સોશિયલ મીડિયા પર વાયરલ થયો છે. સ્ટાર સ્પોર્ટ્સ દ્વારા શેર કરાયેલા આ વીડિયોમાં વૈભવ ક્રીઝની બહાર નીકળીને જોરદાર સિક્સરો ફટકારતો જોવા મળી રહ્યો છે.

શું આજે ડેબ્યુની તક મળશે?
વૈભવ સૂર્યવંશીને આયર્લેન્ડ સામેની સીરીઝમાં ટીમમાં જગ્યા મળી હતી પરંતુ રમવાની તક નહોતી મળી. આયર્લેન્ડ સામે ભારતીય ઓપનર્સ ફ્લોપ રહ્યા હતા, જેમાં સંજુ સેમસન બંને મેચમાં 0 રને આઉટ થયો હતો જ્યારે ઈશાન કિશન માત્ર 12 રન બનાવી શક્યો હતો. ભારતીય ટોપ ઓર્ડરના ખરાબ ફોર્મને કારણે ફેન્સ વૈભવને ટીમમાં સામેલ કરવાની માંગ કરી રહ્યા છે.

IPL અને અંડર-19માં શાનદાર પ્રદર્શન
વૈભવ અત્યારે જબરદસ્ત ફોર્મમાં છે. IPL 2026માં રાજસ્થાન રોયલ્સ તરફથી રમતા તેણે 16 ઇનિંગ્સમાં 237.30ના સ્ટ્રાઈક રેટથી 776 રન બનાવ્યા હતા અને ઓરેન્જ કેપ જીતી હતી. આ સિવાય તે 2026 અંડર-19 વર્લ્ડ કપમાં 'પ્લેયર ઓફ ધ ટુર્નામેન્ટ' રહ્યો હતો અને તાજેતરમાં જ ભારત-એ માટે રમતા માત્ર 29 બોલમાં 94 રન ફટકાર્યા હતા.

સચિન તેંડુલકરનો રેકોર્ડ તૂટી શકે છે
બેટિંગ કોચ સિતાંશુ કોટકે જણાવ્યું છે કે વૈભવને રમાડવો કે નહીં તેનો અંતિમ નિર્ણય હેડ કોચ ગૌતમ ગંભીર અને કેપ્ટન શ્રેયસ અય્યર લેશે. જો આજે વૈભવને તક મળશે તો તે ભારત માટે T20 ઇન્ટરનેશનલ ક્રિકેટ રમનારો સૌથી નાની ઉંમરનો પુરુષ ખેલાડી બનશે અને સચિન તેંડુલકરનો 3 દાયકા જૂનો રેકોર્ડ તોડી નાખશે. ભારત અને ઈંગ્લેન્ડ વચ્ચેની આ મેચ ભારતીય સમય અનુસાર રાત્રે 10 વાગ્યે શરૂ થશે.