વૈભવ સૂર્યવંશીના ડેબ્યૂ પહેલા થથડી ગઈ ઈંગ્લેન્ડની ટીમ, હેરી બ્રૂકે કરી નાખી મોટી વાત

Harry Brook On Vaibhav Suryavanshi : ભારત અને ઈંગ્લેન્ડ વચ્ચે 5 મેચની T20 સિરીઝ શરૂ થાય તે પહેલા જ 15 વર્ષનો ભારતીય બેટ્સમેન વૈભવ સૂર્યવંશી ચર્ચાના કેન્દ્રમાં છે. હજુ સુધી આંતરરાષ્ટ્રીય ક્રિકેટમાં ડેબ્યૂ ન કરનારા આ વિસ્ફોટક ખેલાડીની પ્રતિભાની ગુંજ ઈંગ્લેન્ડના ડ્રેસિંગ રૂમ સુધી પહોંચી ગઈ છે. ઈંગ્લેન્ડના કેપ્ટન હેરી બ્રૂકે વૈભવના જોરદાર વખાણ કર્યા છે અને તેની સામે ખાસ રણનીતિ તૈયાર હોવાની વાત સ્વીકારી છે.

ઇંગ્લેન્ડના કેપ્ટન હેરી બ્રૂકે શું કહ્યું?
મેચ પહેલા મીડિયા સાથેની વાતચીતમાં કેપ્ટન હેરી બ્રૂકે વૈભવને અસાધારણ ખેલાડી ગણાવ્યો હતો. બ્રૂકે કહ્યું કે, માત્ર 15 વર્ષની ઉંમરે વૈભવે જે સિદ્ધિઓ મેળવી છે તે અવિશ્વસનીય છે. જો તે મેચમાં રમશે તો અમારી ટીમ તેની સામે પૂરી તૈયારી અને ખાસ વ્યૂહરચના સાથે મેદાનમાં ઉતરશે, જેથી અમારા જીતવાની શક્યતા વધી શકે.

વૈભવના ડેબ્યૂ પર સસ્પેન્સ
IPL 2026 માં પોતાના આક્રમક અંદાજથી ધમાલ મચાવ્યા બાદ વૈભવ સૂર્યવંશીને ભારતીય ટીમમાં સ્થાન મળ્યું હતું. જો કે, આયર્લેન્ડ પ્રવાસ પર તેને રમવાની તક મળી ન હતી. ઈંગ્લેન્ડ સામેની પ્રથમ મેચની પ્લેઇંગ 11 માં પણ તેના સ્થાનને લઈને હજુ સસ્પેન્સ યથાવત છે. કેટલાક પૂર્વ ક્રિકેટરો તેને તરત જ તક આપવાની તરફેણમાં છે, જ્યારે કેટલાક માને છે કે યોગ્ય સમયની રાહ જોવી જોઈએ.

વિરોધી ટીમની ખાસ નજર
વૈભવને ભારતીય ક્રિકેટનો આગામી મોટો સુપરસ્ટાર માનવામાં આવી રહ્યો છે. આ જ કારણે ડેબ્યૂ પહેલા જ વિરોધી ટીમ તેના રમતનું આકલન કરી રહી છે. જો પ્રથમ T20 મેચમાં વૈભવને રમવાની તક મળશે તો ઈંગ્લેન્ડની ટીમ આ યુવા બેટ્સમેનને શરૂઆતથી જ દબાણમાં લાવવાનો પૂરો પ્રયાસ કરશે.