અભિષેક શર્માએ રચ્યો ઈતિહાસ, આ વખતે બેટથી નહીં પણ બોલથી બનાવ્યો મહા રેકોર્ડ

ભારતીય ટીમના યુવા ઓપનર અભિષેક શર્માએ ઝિમ્બાબ્વે સામે રમાયેલી બીજી T20I મેચમાં એવો કમાલ કરી બતાવ્યો છે, જે તેના પહેલાં કોઈપણ ભારતીય ઓપનર કરી શક્યો ન હતો. બેટિંગમાં માત્ર 8 રન બનાવીને સસ્તામાં આઉટ થવા છતાં, અભિષેકે બોલિંગમાં શાનદાર વાપસી કરી અને T20 ઇન્ટરનેશનલમાં એક નવો રેકોર્ડ પોતાના નામે કરી લીધો છે. તેણે મેચની અંતિમ વિકેટ લઈને ભારતની શાનદાર જીત પર મહોર લગાવી હતી.

અભિષેક શર્માની જાદુઈ બોલિંગ

• મેચની શરૂઆત અભિષેક શર્મા માટે સારી રહી ન હતી. ફાસ્ટ બોલર બ્લેસિંગ મુઝારબાનીએ તેને 8 રનના અંગત સ્કોર પર પેવેલિયન મોકલી દીધો હતો. પરંતુ જ્યારે બોલ તેના હાથમાં આવ્યો ત્યારે તેણે આખી બાજી પલટી નાખી.

• કેપ્ટને તેનો પાર્ટ-ટાઈમ સ્પિનર તરીકે ઉપયોગ કર્યો અને તેણે આ વિશ્વાસ સાચો પાડી બતાવ્યો.

• અભિષેક શર્માએ 4 ઓવરમાં માત્ર 17 રન આપીને 3 વિકેટ ઝડપી હતી.

• સતત દબાણ બનાવીને તેણે ઝિમ્બાબ્વેની વાપસીની તમામ આશાઓ પર પાણી ફેરવી દીધું હતું અને ભારતની 90 રનની શાનદાર જીતનો હીરો બન્યો. આ જીત સાથે ભારતે ત્રણ મેચની સિરીઝ પણ પોતાના નામે કરી લીધી છે.

વીનૂ માંકડ અને રવિ શાસ્ત્રીની ક્લબમાં સામેલ

આ શાનદાર પ્રદર્શન સાથે અભિષેક શર્મા હવે T20 ઇન્ટરનેશનલમાં સૌથી શ્રેષ્ઠ બોલિંગ ફિગર નોંધાવનાર ભારતીય ઓપનર બની ગયો છે. તેણે આ મામલે તમામ ભારતીય ઓપનરોને પાછળ છોડી દીધા છે. આ સિદ્ધિ સાથે જ અભિષેકનું નામ ભારતીય ક્રિકેટના બે મહાન ઓલરાઉન્ડરો વીનૂ માંકડ અને રવિ શાસ્ત્રીની ખાસ યાદીમાં સામેલ થઈ ગયું છે.

ભારતીય ઓપનરોનું શ્રેષ્ઠ બોલિંગ પ્રદર્શન

• ટેસ્ટ: વીનૂ માંકડ - 8/52 વિરુદ્ધ પાકિસ્તાન (1952)

• ODI: રવિ શાસ્ત્રી - 5/15 વિરુદ્ધ ઓસ્ટ્રેલિયા (1991)

• T20I: અભિષેક શર્મા - 3/17 વિરુદ્ધ ઝિમ્બાબ્વે (2026)

ઈશાન કિશન અને તિલક વર્માની તોફાની બેટિંગ

• આ પહેલા ભારતની શરૂઆત ખૂબ જ ખરાબ રહી હતી. ટીમે માત્ર 29 રનમાં 2 વિકેટ ગુમાવી દીધી હતી. આવા મુશ્કેલ સમયે ઈશાન કિશન અને તિલક વર્માએ જવાબદારી સંભાળી હતી.

• ઈશાન કિશને આક્રમક અંદાજમાં રમતા 81 રનની શાનદાર ઇનિંગ રમી.

• તિલક વર્માએ પણ અણનમ 60 રન બનાવ્યા.

• બંનેની શાનદાર બેટિંગના આધારે ભારતે 5 વિકેટે 219 રનનો વિશાળ સ્કોર ઊભો કર્યો હતો.

220 રનના લક્ષ્યાંકનો પીછો કરવા ઉતરેલી ઝિમ્બાબ્વેની ટીમની શરૂઆત આક્રમક રહી હતી, પરંતુ ભારતીય બોલરોએ મેચ પર પકડ બનાવી લીધી. યશ ઠાકુર અને પ્રિન્સ યાદવે 2-2 વિકેટ ઝડપી હતી. ભારતીય બોલરોએ ઝિમ્બાબ્વેને 129 રનમાં ઓલઆઉટ કરી દીધું હતું.