ઓનલાઈન ગેમિંગની કમાલ! માત્ર 22 વર્ષની ઉંમરમાં 14 હજાર કરોડની માલિક બની આ યુવતી

Kim Jung Youn Youngest Female Tech Billionaire: માત્ર 22 વર્ષની ઉંમરે અબજોપતિ બનવું સાંભળવામાં કોઈ સ્વપ્ન જેવું લાગે છે. પરંતુ દક્ષિણ કોરિયાની કિમ જંગ યુન (Kim Jung-youn) સાથે આવું જ બન્યું છે. Forbes ની 2026 World's Billionaires List માં તેનું નામ વિશ્વની સૌથી નાની વયની મહિલા ટેક અબજોપતિઓમાં સૌથી ઉપર છે. તેની સંપત્તિ કોઈ સ્ટાર્ટઅપ જાતે ઊભું કરીને નથી આવી, પરંતુ તેના પિતા દ્વારા સ્થાપિત ગેમિંગ કંપની Nexon માંથી મળેલી હિસ્સેદારીને કારણે આવી છે.

કિમ જંગ યુનની સંપતી 14,000 કરોડ રૂપિયા!

Forbesના જણાવ્યા મુજબ 2026 ની યાદીમાં કિમ જંગ યુનની નેટવર્થ આશરે 1.7 અબજ ડોલર (આશરે 14,000 કરોડ રૂપિયા) છે. તે દક્ષિણ કોરિયાની છે, અને તેની સંપત્તિનો મુખ્ય સ્ત્રોત ઓનલાઇન ગેમિંગ છે. Forbes ની યાદીમાં તે 22 વર્ષની ઉંમરે વિશ્વના સૌથી નાની વયના અબજોપતિઓમાં સામેલ છે. જોકે, વિશ્વની સૌથી નાની વયની મહિલા અબજોપતિનો રેકોર્ડ આ વર્ષે 20 વર્ષની એમિલી વાયગટના નામે છે. તેથી કિમ જંગ યુનને ખાસ કરીને સૌથી નાની વયની મહિલા 'ટેક' અબજોપતિ કહેવું વધુ યોગ્ય રહેશે.

પિતાએ બનાવી ગેમિંગની આટલી મોટી કંપની

કિમ જંગ યુનના પિતા કિમ જંગ જૂએ 1994 માં નેક્સન (Nexon) ની શરૂઆત કરી હતી. આ એ જ કંપની છે, જેણે ઓનલાઇન ગેમિંગની દુનિયામાં મોટો ફેરફાર કર્યો. નેક્સને MapleStory, KartRider અને Dungeon & Fighter જેવી ગેમ્સ બનાવી, જે વિશ્વભરમાં ખૂબ લોકપ્રિય થઈ. ફોર્બ્સ મુજબ કંપની 80 થી વધુ લાઈવ ગેમ્સ ચલાવે છે, અને 72 થી વધુ દેશોમાં તેના યુઝર્સ છે. કિમ જંગ જૂએ માત્ર ગેમ બનાવવા પર ધ્યાન આપ્યું નહીં, પરંતુ ઓનલાઇન ગેમિંગના એ મોડેલને પણ આગળ વધાર્યું, જેમાં ગેમ મફતમાં રમી શકાય છે, અને કંપની અન્ય રીતે કમાણી કરે છે. નેક્સનને આ Free-to-Play મોડેલની શરૂઆતી અગ્રણી કંપની માનવામાં આવે છે.

2022માં બદલાઈ ગઈ આખી કહાની

કિમ જંગ યુનના જીવનમાં મોટો ફેરફાર વર્ષ 2022 માં આવ્યો. તેના પિતા કિમ જંગ જૂનું 54 વર્ષની વયે નિધન થયું. તેમના નિધન બાદ તેમની પુત્રીઓ કિમ જંગ મિન અને કિમ જંગ યુનને પરિવારની કંપનીમાં મોટી હિસ્સેદારી મળી. બંને બહેનોની સંપત્તિનો મોટો હિસ્સો નેક્સનની સૌથી મોટી શેરહોલ્ડિંગ કંપની NXC માં તેમની હિસ્સેદારી સાથે જોડાયેલો છે.

ફોર્બ્સ મુજબ બંને બહેનો પાસે NXCમાં હિસ્સેદારી છે, જ્યારે NXC જાપાનના શેરબજારમાં લિસ્ટ થયેલી નેક્સનની સૌથી મોટી શેરહોલ્ડર છે. કિમ જંગ યુનની પોતાની હિસ્સેદારી આશરે 9 ટકા બતાવવામાં આવી છે. એટલે કે અહીં એક વાત સ્પષ્ટ સમજવી જરૂરી છે કે, કિમ જંગ યુને નેક્સન જાતે શરૂ નથી કરી અને ન તો તે કંપનીના રોજિંદા કામકાજ ચલાવે છે. ફોર્બ્સ મુજબ બંને બહેનો નેક્સનના ઓપરેશન્સમાં સામેલ નથી, અને તેમની અંગત જિંદગી વિશે પણ ખૂબ ઓછી માહિતી જાહેર છે. તેમની અબજો ડોલરની સંપત્તિ પિતા પાસેથી મળેલી વિરાસત માંથી આવી છે.

18 વર્ષની ઉંમરે પણ બની ચૂકી હતી અબજોપતિ

કિમ જંગ યુનનું નામ પહેલીવાર વર્ષ 2022માં ચર્ચામાં આવ્યું હતું. તે સમયે ફોર્બ્સે તેને માત્ર 18 વર્ષની ઉંમરે વિશ્વની સૌથી નાની વયની અબજોપતિ બતાવી હતી. પિતાના અવસાન બાદ તેને અને તેની મોટી બહેનને NXCમાં મોટી હિસ્સેદારી મળી હતી. તે સમયે ફોર્બ્સે જણાવ્યું હતું કે, દક્ષિણ કોરિયાના ભારે ઇનહેરિટન્સ ટેક્સ (વારસા વેરા) બાદ બંને બહેનોની અંદાજિત સંપત્તિ આશરે 1 અબજ ડોલર હતી.

આજની ગેમિંગ દુનિયામાં Nexonની કેટલી મોટી ભૂમિકા છે?

નેક્સનની કહાની માત્ર એક પરિવારની દોલતની કહાની નથી. કંપનીએ દક્ષિણ કોરિયા અને જાપાનથી નીકળીને ઓનલાઇન ગેમિંગના ગ્લોબલ માર્કેટમાં પોતાનું સ્થાન બનાવ્યું. MapleStory અને Dungeon & Fighter જેવી ગેમ્સ લાંબા સમયથી કંપનીના સૌથી મોટા નામોમાં સામેલ છે. આ જ કારણ છે કે, નેક્સનમાં હિસ્સેદારીએ કિમ પરિવારને ટેક અને ગેમિંગની દુનિયાના સૌથી અમીર પરિવારોમાં સામેલ કરી દીધો છે.