કંપનીઓમાં 'બોસ સ્કેમ'નો આતંક: દિલ્હી, ગુજરાત, મહારાષ્ટ્ર અને રાજસ્થાનની પેઢીઓ સાયબર ઠગોના નિશાને, WhatsApp હેક કરીને લાખો રૂપિયાની છેતરપિંડી
Summarized by AI; it may make mistakes. Check important info
Summarized by AI; it may make mistakes. Check important info
Boss Scam Targets Indian Companies: દેશના કોર્પોરેટ સેક્ટરમાં 'બોસ સ્કેમ' નામના એક નવા અને અત્યંત ખતરનાક સાયબર ફ્રોડે હાહાકાર મચાવ્યો છે. ખાસ કરીને ગુજરાત, મહારાષ્ટ્ર, દિલ્હી અને રાજસ્થાનમાં આવેલી અનેક કંપનીઓને સાયબર ઠગોએ નિશાન બનાવી છે. હેકર્સ માલવેર વાયરસ દ્વારા કંપનીના ઉચ્ચ અધિકારીઓના WhatsApp એકાઉન્ટ્સ હાઇજેક કરી રહ્યા છે અને ત્યારબાદ ફાઇનાન્સ ટીમને બોસ બનીને તાત્કાલિક નાણાં ટ્રાન્સફર કરવાના મેસેજ મોકલી રહ્યા છે. ઇન્ડિયન સાયબર ક્રાઈમ કોઓર્ડિનેશન સેન્ટર (I4C) અને માર્કેટ રેગ્યુલેટર સેબી દ્વારા આ અંગે ગંભીર ચેતવણી જારી કરવામાં આવી છે કે આ નવી પદ્ધતિથી અનેક કંપનીઓ લાખો રૂપિયા ગુમાવી ચૂકી છે.
માલવેર ફાઇલો દ્વારા WhatsApp Web હાઇજેક કરવાની નવી મોડસ ઓપરેન્ડી
સાયબર નિષ્ણાતોના જણાવ્યા અનુસાર, આ કૌભાંડ ખૂબ જ આયોજનબદ્ધ રીતે આચરવામાં આવી રહ્યું છે:
ફેક ઓફિશિયલ ડોક્યુમેન્ટ્સ: ઠગો સૌથી પહેલાં કર્મચારીઓને "Statement of Account.zip" કે "RBI.zip" જેવા સત્તાવાર લાગતા નામો સાથે માલવેર વાયરસવાળી ઝિપ ફાઇલો મોકલે છે.
સિસ્ટમમાં પ્રવેશ અને એકાઉન્ટ ટેકઓવર: જેવી કોઈ વ્યક્તિ આ શંકાસ્પદ ફાઇલ ખોલે છે, કે તરત જ માલવેર સિસ્ટમમાં પ્રવેશી જાય છે અને અધિકારીના કમ્પ્યુટરમાં ચાલતા 'WhatsApp Web' સેશનનો સમગ્ર કંટ્રોલ હેકર્સ પાસે જતો રહે છે.
બોસ બનીને તાત્કાલિક પેમેન્ટના આદેશ: એકાઉન્ટ હાઇજેક કર્યા પછી ઠગો ખુદ બોસ કે વરિષ્ઠ અધિકારી બનીને કંપનીના એકાઉન્ટ્સ અને ફાઇનાન્સ સ્ટાફ સાથે ચેટિંગ શરૂ કરે છે. તેઓ અત્યંત ઈમરજન્સી અને અગત્યનું કામ હોવાનું કહીને તાત્કાલિક ફંડ ટ્રાન્સફર કરવા દબાણ કરે છે. ઉચ્ચ અધિકારી તરફથી મેસેજ હોવાથી કર્મચારીઓ ઘણીવાર ચકાસણી કર્યા વિના નાણાં ટ્રાન્સફર કરી દે છે.
તપાસ એજન્સીઓની ચેતવણી અને સાવચેતીનાં પગલાં
તપાસ એજન્સીઓના જણાવ્યા મુજબ, આ પ્રકારના હુમલાઓ પાછળ મોટા પાયે સંગઠિત સાયબર નેટવર્ક કામ કરી રહ્યું છે. સત્તાવાળાઓએ તમામ કંપનીઓ અને કર્મચારીઓને કડક સૂચના આપી છે કે WhatsApp કે અન્ય કોઈ ચેટિંગ એપ પર આવતા કોઈપણ નાણાકીય આદેશ પર આંખ મીંચીને વિશ્વાસ ન કરવો. પેમેન્ટ કરતાં પહેલાં સંબંધિત અધિકારી સાથે ફોન પર વાત કરીને અથવા રૂબરૂ ક્રોસ વેરિફિકેશન કરવું અને અજાણી કે શંકાસ્પદ .zip ફાઇલો ખોલવાનું સંપૂર્ણપણે ટાળવું.
