હવે રીલ્સનું અલ્ગોરિધમ તમારી મરજીથી ચાલશે! ઈન્સ્ટાગ્રામની જાહેરાતથી યુઝર્સ ખુશખુશાલ

Instagram to Change Algorithm: શું ઇન્સ્ટાગ્રામ તમને પણ ફાલતુ અને બિનજરૂરી વીડિયો બતાવે છે? જો હા, તો તમારા માટે એક ખૂબ જ મોટા સમાચાર છે. ઇન્સ્ટાગ્રામના હેડ એડમ મોસેરીએ એક નવા 'Your Algorithm' ટૂલની જાહેરાત કરી છે, જેનાથી યુઝર્સ પોતાના ફીડ અને રીલ્સને જાતે જ કંટ્રોલ કરી શકશે. હવે ઇન્સ્ટાગ્રામનું એલ્ગોરિધમ તમને જબરદસ્તી કોઈ વીડિયો બતાવી શકશે નહીં.
એડમ મોસેરીએ સોશિયલ મીડિયા પર કેટલાક એવા અપકમિંગ ફીચર્સની ઝલક શેર કરી છે, જે યુઝર્સના કન્ટેન્ટ જોવાની રીતને સંપૂર્ણપણે બદલી નાખશે. વર્ષ 2025માં શરૂ કરાયેલા 'Your Algorithm' ટૂલને હવે કંપની વધુ સરળ અને મજેદાર બનાવવા જઈ રહી છે, જેથી તમે રીલ્સ જોતા-જોતા જ તેને રીસેટ કે ચેન્જ કરી શકશો.
હવે યુઝર્સના હાથમાં હશે ઇન્સ્ટાગ્રામની કમાન
ઇન્સ્ટાગ્રામ પોતાના પ્લેટફોર્મને વધુ યુઝર-ફ્રેન્ડલી બનાવવા માટે સતત બદલાવ કરી રહ્યું છે. આ નવા અપડેટ પાછળનો આઇડિયા ખૂબ જ સિમ્પલ છે. હવે યુઝર્સે પોતાની પસંદગીનું કન્ટેન્ટ સેટ કરવા માટે એપના સેટિંગ્સમાં જઈને મગજમારી નહીં કરવી પડે.
એડમ મોસેરી દ્વારા શેર કરાયેલા પ્રિવ્યૂ મુજબ, હવે તમે સીધા જ તમારા હોમ ફીડ પરથી એલ્ગોરિધમને સુધારી શકશો. ઉદાહરણ તરીકે, જેવું તમે ઇન્સ્ટાગ્રામના હોમ પેજને નીચેની તરફ ખેંચશો, તમારી સામે 'Your Algorithm'નું એક નવું મેનૂ ખૂલી જશે.
રીલ જોતી વખતે જ બદલાઈ જશે તમારો મૂડ
આટલું જ નહીં, ઇન્સ્ટાગ્રામ અન્ય એક શાનદાર કોન્સેપ્ટ પર પણ કામ કરી રહ્યું છે. જે અંતર્ગત:

• રીયલ-ટાઇમ ટ્યુનિંગ: જ્યારે તમે કોઈ રીલ જોઈ રહ્યા હશો, ત્યારે માત્ર એક સ્વાઇપ અપ કરીને તમે નક્કી કરી શકશો કે તમારે આગળ કેવા વીડિયો જોવા છે.
• નવા કંટ્રોલ બટન્સ: રીલ્સની બરાબર નીચે કેટલાક નવા બટન્સ ટેસ્ટ કરવામાં આવી રહ્યા છે. આ બટન્સ પર ક્લિક કરીને તમે એપને તરત જ કહી શકો છો કે તમારે આવા વીડિયો વધુ જોવા છે કે ઓછા.

જોકે, મોસેરીએ સ્પષ્ટ કર્યું છે કે હાલમાં આ ફીચર્સનું ટેસ્ટિંગ ચાલી રહ્યું છે અને તેમાંથી કેટલાક ફીચર્સ ટૂંક સમયમાં જ ગ્લોબલી રોલઆઉટ કરવામાં આવશે.

યુઝર્સ લાંબા સમયથી કરી રહ્યા હતા માંગ
આ જાહેરાત એવા સમયે આવી છે જ્યારે વિશ્વભરના યુઝર્સ ઇન્સ્ટાગ્રામના એલ્ગોરિધમથી ઘણા નારાજ ચાલી રહ્યા હતા. મોસેરીની પોસ્ટ પર સૌથી વધુ લાઇક કરાયેલી એક કમેન્ટમાં લખ્યું હતું કે, "અમે બસ એટલું જ ઇચ્છીએ છીએ કે અમારું એલ્ગોરિધમ અમને એવા લોકોની પોસ્ટ બતાવે જેમને અમે ફોલો કરીએ છીએ." યુઝર્સની આ જ ફરિયાદને દૂર કરવા માટે ઇન્સ્ટાગ્રામ આ મોટું પગલું ભરી રહ્યું છે.
કેરોસેલ પોસ્ટ માટે પણ ધમાકેદાર ફીચર
યુઝર્સના ફીડબેકને ધ્યાનમાં રાખીને ઇન્સ્ટાગ્રામએ તાજેતરમાં જ એક અન્ય મજેદાર ફીચર લોન્ચ કર્યું છે. હવે યુઝર્સ પોતાની કેરોસેલ પોસ્ટ (એકસાથે મલ્ટિપલ ફોટોવાળી પોસ્ટ)માં દરેક સિંગલ ફોટો માટે અલગ-અલગ કેપ્શન લખી શકશે. આ પહેલાં આખી પોસ્ટ માટે માત્ર એક જ કેપ્શન લખવાની મંજૂરી હતી. હવે એક સિમ્પલ બટન ઓન કરીને દરેક તસવીરની પોતાની અલગ સ્ટોરી અને કેપ્શન સેટ કરી શકાશે, જેનાથી ક્રિએટર્સને ઘણી સરળતા રહેશે.