શું તમારા મોબાઇલનું કોલ અને કીપેડ સ્ક્રીન અચાનક બદલાઈ ગયું છે? જાણો કેમ આવું થયું...

Google Android Keypad Design Change: શું તમારા એન્ડ્રોઇડ મોબાઇલનું ડાયલર અથવા તો કોલ સ્ક્રીન અચાનક બદલાઈ ગયું છે? જો એવું હોય તો તમે એકલા નથી. ઘણાં યુઝર્સના મોબાઇલની ફોન એપમાં આ લેઆઉટમાં બદલાવ જોવા મળી રહ્યો છે. યુઝર્સ દ્વારા કોઈ મેન્યુઅલ અપડેટ ન કરી હોવા છતાં એ જોવા મળી રહ્યું છે. યુઝરને આ માટે કોઈ નોટિફિકેશન પણ આપવામાં નથી આવ્યું. આ માટેનું કારણ ગૂગલ પોતે છે. ગૂગલ દ્વારા મટિરિયલ 3 એક્સપ્રેસિવ રીડિઝાઇન રિલીઝ કરવામાં આવી છે. એટલે કે ગૂગલની કોમ્યુનિકેશનની મુખ્ય એપ્લિકેશનની કોર ડિઝાઇનને બદલવામાં આવી છે.

ગૂગલની ફોન એપમાં નવું શું છે?

ગૂગલ દ્વારા મટિરિયલ 3 એક્સપ્રેસિવ રીડિઝાઇન દ્વારા મોર્ડન લૂક આપવામાં આવી રહ્યો છે. એન્ડ્રોઇડ અને વેર ઓએસ વચ્ચે હવે યુઝરને સરખો અને સારો અનુભવ મળે એની કોશિશ કરવામાં આવી રહી છે. આ માટે ફોન એપમાં કેટલાક બદલાવ કરવામાં આવ્યાં છે.

યુનિફાઇડ હોમ ટેબ: ફેવરિટ નંબર અને રિસેન્ટ કોલ નંબરને હવે એક જ ટેબમાં સમાવેશ કરવામાં આવ્યો છે. કોલ હિસ્ટ્રીની ઉપર હવે ફેવરિટ નંબરને દેખાડવામાં આવશે. એક રીતે કહીએ તો સ્ક્રીનના ભાગલા પાડવામાં આવ્યાં છે.

કીપેડમાં બદલાવ: એક્શન બટન જે હતું એને કાઢી નાખવામાં આવ્યું છે. કીપેડનું હવે પોતાની ટેબ છે અને એને હવે ગોળાકાર બનાવી દેવામાં આવી છે. આ એક કાર્ડ-સ્ટાઇલ લેઆઉટ છે.

નેવિગેશન ડ્રોઅર: કોન્ટેક્ટ એક્સેસ, સેટિંગ્સ, કોલ હિસ્ટ્રી અને હેલ્પનો સમાવેશ હવે નેવિગેશન ડ્રોઅરમાં કરવામાં આવ્યો છે. સર્ચ બારમાંથી પણ હવે એને એક્સેસ કરી શકાશે.

ઇનકમિંગ કોલ જેસ્ચર્સ: યુઝર હવે ફોનનો જવાબ આપવો હોય કે પછી એને રીજેક્ટ કરવો હોય તો હોરિઝોન્ટલ સ્વાઇપ અથવા તો સિંગલ ટેપ દ્વારા કરી શકાશે. આ માટે યુઝરે સેટિંગ્સમાં ઇનકમિંગ કોલ જેસ્ચરમાં જઈને પોતાનું પસંદગીનું જેસ્ચર સિલેક્ટ કરવાનું રહેશે.

ઇન-કોલ ઇન્ટરફેસ: ફોન ચાલુ હોય ત્યારે મ્યુટ, સ્પીકર અને એન્ડ કોલ બટનને કેપ્સુલ જેવા બનાવવામાં આવ્યાં છે. સાઇઝમાં થોડા મોટા પણ કરવામાં આવ્યાં છે. ફોન એન્ડ કરવાનું રેડ બટન ખૂબ જ મોટું દેખાઈ રહ્યું છે.

યુઝર્સના મળી રહ્યાં છે મિક્સ રિએક્શન

ગૂગલ દ્વારા કહેવામાં આવી રહ્યું છે કે આ ડિઝાઇન એકદમ સાફ-સુધરી છે. જોકે ઘણાં યુઝર્સને એ પસંદ નથી આવી રહી. સોશિયલ મીડિયા પર અને રેડિટ પર યુઝર્સ દ્વારા આ વિશે ફરિયાદ કરવામાં આવી રહી છે. એક યુઝરે કહ્યું, ‘ફોન એપના બટન પહેલાં એકદમ પર્ફેક્ટ હતા, હવે બટન મોટા બ્લોકવાળા, મોટી સાઇઝના અને એકદમ ગંદા દેખાઈ છે.’ એક યુઝરે કહ્યું કે આટલા મોટા બટન આપવાનું કામ શું છે હું કંઈ આંધળો નથી. મોટાભાગના યુઝર્સને કોલ એન્ડ કરવા માટેનું લાલ બટન ખૂબ જ ખટકી રહ્યું છે. લાલ કલર અને એટલી મોટી સાઇઝ હોવાથી સીધું આંખમાં જતી રહે છે. કેટલાક યુઝર્સને બટનની જગ્યા બદલાઈ ગઈ હોવાથી થોડું કન્ફ્યુઝન થઈ રહ્યું છે.

શું ફરી પહેલાં જેવી ડિઝાઇન મેળવી શકાશે?

કોલ ઉઠાવવા અને કટ કરવા માટેના જેસ્ચર માટે યુઝર્સ સેટિંગ્સમાં જઈને ઇનકમિંગ કોલ જેસ્ચરને સિંગલ ટેપ કરી શકે છે. આથી આ ફીચર પહેલાં જેવું કામ કરશે. તેમ જ ડિઝાઇન માટે એપ સેટિંગ્સમાં જઈને અપડેટને ડિલીટ મારી દેવાથી આ ડિઝાઇન નીકળી જશે અને પહેલાં હતી એ આવી જશે. ઘણાં યુઝર્સ દ્વારા એ કરવામાં પણ આવ્યું છે. જોકે ગૂગલ તેમની આ ડિઝાઇનને દરેક વર્ઝનમાં રજૂ કરી રહી હોવાથી આ ઉપાય થોડા સમય માટે હોય શકે છે, પરંતુ ત્યાર બાદ આ ડિઝાઇન દરેક મોબાઇલમાં ફરજિયાત જેવી થઈ જશે જ્યાં સુધી ગૂગલ એમાં બદલા નહીં કરે.

આ પણ વાંચો: જુઓ આવું દેખાશે ભારતીય અંતરિક્ષ સ્ટેશન, 2035 સુધીમાં થઈ જશે તૈયાર…

કેમ કરવામાં આવ્યો અચાનક બદલાવ?

ગૂગલ દ્વારા મટિરિયલ 3 એક્સપ્રેસિવ રીડિઝાઇન કરવામાં આવી છે કારણ કે તેઓ તેમની પોતાની એપ્લિકેશનને એક નવો લૂક આપવા માગે છે. એપલ જે રીતે ગ્લાસ ડિઝાઇન લઈને આવી રહ્યું છે એમ ગૂગલ પણ પોતાની ડિઝાઇનમાં બદલાવ કરવા માગે છે. આથી એમાં ઘણાં કલર પેલેટ્સનો સમાવેશ કરવામાં આવ્યો છે. એનિમેશન પણ એકદમ સ્મૂથ રહે એની કાળજી રાખવામાં આવી છે. તેમ જ ફોન, મેસેજ અને ક્લોકની ડિઝાઇનમાં બદલાવ કરવામાં આવ્યો છે જેથી એન્ડ્રોઇડને જોવામાં થોડું નવીનતા લાગે. જોકે દરેકને આ પસંદ નથી આવી રહી.