ટેક જગતમાં છટણીનો ઘાતક દોર: AIની એન્ટ્રી અને 10 જ દિવસમાં 6,300થી વધુ લોકો બેરોજગાર

Layoffs in the Tech Industry: શું ટેક્નોલોજી ક્ષેત્રે નોકરીની સુરક્ષા ભૂતકાળ બની રહી છે? સપ્ટેમ્બર 2026 ના આંકડાઓ જોતાં આ સવાલ ફરી એકવાર ગંભીરતાથી સામે આવ્યો છે. વૈશ્વિક ટેક જગતમાં છટણીની નવી લહેર શરૂ થઈ ચૂકી છે. કંપનીઓ હવે મોટા સ્ટાફને બદલે આર્ટિફિશિયલ ઈન્ટેલિજન્સ (AI) તરફ વળી રહી છે, જેના કારણે માત્ર સપ્ટેમ્બર મહિનાના શરૂઆતના દિવસોમાં જ હજારો કર્મચારીઓએ પોતાની નોકરી ગુમાવવાનો વારો આવ્યો છે.

છટણીના કારણો શું?

સપ્ટેમ્બર 2026 ના પ્રથમ 10 દિવસમાં જ દુનિયાભરમાં 6,300 થી વધુ ટેક નોકરીઓ ખતમ કરી દેવામાં આવી છે. ઉબેર, પેપાલ, એપલ, ઝોમેટો અને ઓરેકલ જેવી મોટી કંપનીઓ આ છટણીમાં મોખરે છે. આ કાપ પાછળ AI ઉપરાંતના કારણો પણ જવાબદાર છે. કંપનીઓ ધીમી પડતી વૃદ્ધિ, કોરોના મહામારી દરમિયાન થયેલું ઓવર-હાયરિંગ, મેનેજમેન્ટનું વધેલું કદ અને બદલાતા બિઝનેસ મોડેલ જેવા પડકારોનો સામનો કરી રહી છે. આ ઉપરાંત, કંપનીઓ નફાકારકતા વધારવા અને ખર્ચ ઘટાડવા માંગે છે. તેથી જ તેઓ પોતાનું મૂડી રોકાણ AI, ઓટોમેશન અને ક્લાઉડ કમ્પ્યુટિંગ જેવી ઉત્પાદકતા વધારતી નવી ટેક્નોલોજીમાં કરી રહ્યા છે.

કઈ કંપનીમાં કેટલી નોકરીઓ ગઈ?

• Uber (ઉબેર): આ લહેરમાં સૌથી મોટો કાપ ઉબેર દ્વારા કરાયો છે. કંપનીએ તેના કોર્પોરેટ સ્તરના લગભગ 3,300 હોદ્દાઓ નાબૂદ કર્યા છે, જે તેના કુલ વૈશ્વિક કર્મચારીઓના 10% છે. રોગચાળા પછીનો કંપનીનો આ સૌથી મોટો કાપ છે. એની પાછળનો હેતુ મેનેજમેન્ટના સ્તરો ઘટાડવા, ટીમોને એકત્રિત કરવા અને નિર્ણય લેવાની પ્રક્રિયા ઝડપી બનાવવાનો છે. વળી, કંપની પર રોબોટેક્સી અને ડ્રાઈવર વગરના વાહનોની ટેક્નોલોજીમાં રોકાણ કરવાનું દબાણ પણ છે.
• PayPal (પેપાલ): ભારતમાં પેપાલે તેના ચેન્નાઈ, બેંગલુરુ અને હૈદરાબાદના કેન્દ્રોમાંથી 220 કર્મચારીઓને છૂટા કર્યા છે, જે તેના ભારતીય વર્કફોર્સના 4% છે. આ કાપ ટેક્નોલોજી, એન્જિનિયરિંગ, ઓપરેશન્સ, પેમેન્ટ અને ફાઇનાન્સ વિભાગોમાં કરવામાં આવ્યો છે. આ પગલું કંપનીની વૈશ્વિક કામગીરીને વધુ કાર્યક્ષમ બનાવવાના પરિવર્તનનો ભાગ છે.
• Apple (એપલ): એપલે તેની Siri અને Vision Pro ની ટીમોમાંથી 200થી વધુ હોદ્દાઓ દૂર કર્યા છે, કારણ કે કંપની હવે નેક્સ્ટ જનરેશન AI પ્રોડક્ટ્સ પર ધ્યાન કેન્દ્રિત કરવા પોતાની ટીમોનું પુનર્ગઠન કરી રહી છે.
• Oracle (ઓરેકલ): ઓરેકલ પણ મોટા પાયે વૈશ્વિક સ્તરે છટણીની તૈયારી કરી રહી છે, જેની અસર હજારો કર્મચારીઓ પર પડી શકે છે. જોકે આ અંગે 7 સપ્ટેમ્બર સુધી કોઈ સત્તાવાર જાહેરાત થઈ ન હતી. છેલ્લા 12 મહિનામાં ઓરેકલે ક્લાઉડ ઇન્ફ્રાસ્ટ્રક્ચર અને AI પાછળ ખર્ચ વધારતી વખતે પોતાના વર્કફોર્સમાં નોંધપાત્ર ઘટાડો કર્યો છે.
• Zomato (ઝોમેટો): ભારતીય ફૂડ ડિલિવરી જાયન્ટ ઝોમેટોએ પણ તેના વિવિધ વિભાગોમાંથી કર્મચારીઓની છટણી કરીને કોસ્ટ-કટિંગની દિશામાં પગલું ભર્યું છે.

વૈશ્વિક ચિત્ર અને ભવિષ્યની દિશા

લાઇવ ટ્રેકર વેબસાઇટ Layoffs.fyi ના ડેટા મુજબ, આ કોઈ નાની ઘટના નથી પણ એક મોટા વલણનો ભાગ છે. વૈશ્વિક સ્તરે 7 સપ્ટેમ્બર સુધીમાં વર્ષ 2026 માં કુલ 296 કંપનીઓએ 1,29,488 ટેક કર્મચારીઓને છૂટા કર્યા છે. આમાં એમેઝોન અને મેટા જેવી કંપનીઓનો પણ સમાવેશ થાય છે.

ઓછા કર્મચારીઓ સાથે વધુ નફાની લાલચ

ટેક ઇન્ડસ્ટ્રીમાં હવે એક જ પ્રાથમિકતા જોવા મળી રહી છે- ‘ઓછા કર્મચારીઓ સાથે વધુ કામ કરવું’. આ રીતે દુનિયાભરની કંપનીઓ આક્રમક વિસ્તરણ કરવાને બદલે ‘લીન વર્કફોર્સ’ અને ટકાઉ નફા પર ધ્યાન કેન્દ્રિત કરી રહી છે. કંપનીઓના બદલાયેલા વલણને કારણે ટેક પ્રોફેશનલ્સ માટે જોબ માર્કેટમાં સ્પર્ધા વધી છે અને નવી સ્કીલ્સ અપગ્રેડ કરવી અનિવાર્ય બની છે.