13 વર્ષની બાળકીએ AI દ્વારા કરી કમાલ, કોડિંગ વગર બનાવી એપ, કલાકોમાં કમાઈ 2.2 લાખ રૂપિયા

Schoolgirl Builds Viral AI App: કોડિંગનું કોઈ પણ પ્રારંભિક જ્ઞાન ન હોવા છતાં ચીનના શાંઘાઈની 13 વર્ષની વિદ્યાર્થિની ઝૂ શુહાને પોતાની અંગત સમસ્યામાંથી એક શાનદાર AI બિઝનેસ આઈડિયા વિકસાવ્યો છે. આઠમા ધોરણમાં અભ્યાસ કરતી શુહાન જ્યારે એકલી ભણતી ત્યારે વારંવાર તેનું ધ્યાન ભટકી જતું અને તે છૂપી રીતે મોબાઈલ વાપરવા લાગતી. પોતાના વર્ગના અન્ય બાળકો પણ આ જ મુશ્કેલીનો સામનો કરી રહ્યા છે તે જોતાં તેણે બાળકો પર નજર રાખતી અને તેમને અભ્યાસમાં ધ્યાન કેન્દ્રિત કરવામાં મદદ કરતી એક 'વર્ચ્યુઅલ પેરન્ટ' AI એપ તૈયાર કરી લીધી.

કોમ્પિટિશનમાં 3 દિવસમાં 90 ગ્રાહકો અને ₹2.2 લાખનું વેચાણ

હાંગઝૂ ખાતે 21થી 23 ઓગસ્ટ દરમિયાન આયોજિત નેશનલ AI પ્રોડક્ટ માર્કેટિંગ કોમ્પિટિશનમાં શુહાનની એપ 'ઝાઈ ચાંગ' એ ભારે ધૂમ મચાવી હતી:

• આ ત્રણ દિવસીય સ્પર્ધામાં તેના AI પ્રોડક્ટને 90 ગ્રાહકોએ ખરીદ્યો, જેના થકી તેણે કુલ 18,000 યુઆન (આશરે ₹2.2 લાખ)નું જંગી વેચાણ નોંધાવ્યું હતું.
• 50થી વધુ સ્પર્ધકો વચ્ચે ઉત્કૃષ્ટ પ્રદર્શન દાખવીને તેણે ત્રીજું સ્થાન પ્રાપ્ત કર્યું અને સાથે 5,000 યુઆનનું રોકડ ઇનામ પણ જીત્યું.
• આ સ્પર્ધાની સૌથી અનોખી બાબત એ હતી કે તેમાં કોઈ ટેકનિકલ જજ નહોતા; વિજેતાઓની પસંદગી માત્ર 3 દિવસમાં પ્રોડક્ટ દ્વારા થયેલી વાસ્તવિક આવકના આધારે જ કરવામાં આવી હતી.

કોડિંગ વગર કેવી રીતે બનાવી એપ?

પ્રોગ્રામિંગનો કોઈ અનુભવ ન હોવા છતાં શુહાને AIના લાર્જ લેંગ્વેજ મોડલને પોતાની સરળ બોલચાલની ભાષામાં પૂરો આઈડિયા સમજાવ્યો અને AI પ્રોગ્રામિંગ ટૂલ્સની મદદથી ટેકનિકલ સમસ્યાઓ ઉકેલી. વિચાર આવ્યાથી લઈને એપના મુખ્ય ફીચર્સ કાર્યરત કરવા સુધી તેને માત્ર ત્રણથી ચાર દિવસનો જ સમય લાગ્યો હતો.

કેવી રીતે કામ કરે છે આ 'ડિજિટલ પેરન્ટ' AI એપ?

• ફોટો અપલોડ અને મોનિટરિંગ: બાળક જ્યારે ભણવા બેસે ત્યારે યુઝર માતા-પિતાનો ફોટો એપમાં અપલોડ કરે છે. એપ સ્ક્રીન પર માતા-પિતાની તસવીર ડિસ્પ્લે થાય છે અને કેમેરા દ્વારા બાળકની ગતિવિધિઓ પર સતત નજર રાખવામાં આવે છે.
• માતા-પિતાના અવાજમાં ચેતવણી: જો બાળક અભ્યાસ છોડીને ફોન વાપરવા લાગે કે ખુરશી પરથી ઊભું થઈને ભાગવા માંડે, તો આ એપ તરત જ માતા-પિતાના અસલ અવાજમાં બોલીને તેને ભણવા બેસી જવાની ચેતવણી આપે છે.
• કોન્સન્ટ્રેશન રિપોર્ટ: સ્ટડી સેશન પૂરું થયા બાદ એપ એક 'કોન્સન્ટ્રેશન રિપોર્ટ' જનરેટ કરે છે, જેનાથી જાણી શકાય છે કે બાળકે કેટલી વાર સુધી એકાગ્રતાથી અભ્યાસ કર્યો.

બાળકોને સુધરવાની તક આપવા માટે 'ચુગલી' ફીચર હટાવ્યું

રસપ્રદ વાત એ છે કે શુહાને આ એપમાંથી તે ફીચર જાતે હટાવી દીધું જે બાળકનું ધ્યાન ભટકવા પર 'માતા ગુસ્સે થશે' તેવો એલર્ટ મેસેજ આપતું હતું. શુહાનના મતે તેને ચુગલી પસંદ નથી; તે ઇચ્છે છે કે એપ બાળકો સાથે સૌમ્ય રહે અને તેમને જાતે જ ભૂલ સુધારવાની પૂરતી તક મળે. આ એપનો પહેલો યુઝર તેનો નાનો ભાઈ બન્યો, જે હવે પહેલાં કરતાં વધુ એકાગ્રતાથી ભણવા લાગ્યો છે. હવે શુહાન આ એપની કિંમત ઓછી કરીને તેને વધુમાં વધુ બાળકો સુધી પહોંચાડવાનું આયોજન કરી રહી છે.