અમદાવાદથી મેફેડ્રોન ડ્રગ્સ લઇ રાજકોટ આવતા બે યુવકો ઝડપાયા

રાજકોટ : બેડી ચોકડીથી ભગવતીપરા તરફ જવાના રસ્તા પરથી એસઓજીએ ૧૮.૭૭ ગ્રામ મેફેડ્રોન ડ્રગ્સ સાથે મૌલિક અશોક જેઠવા (ઉ.વ.૨૯, રહે. ગોલ્ડન પાર્ક, આશિયાના બિલ્ડિંગ, નાનામવા) અને ગૌરાંગ અશોક પરડવા (ઉ.વ.૩૨, રહે. એલીના એન્કલેવ એપાર્ટમેન્ટ, જીવરાજપાર્ક)ને ઝડપી લીધા હતા. અમદાવાદથી બંને આરોપીઓ ડ્રગ્સ લઇ આવી રહ્યા હતા.
એસઓજીએ બાતમીના આધારે વોચ ગોઠવી કારમાં પસાર થયેલા બંને આરોપીઓને અટકાવી તલાશી લેતા મેફેડ્રોન ડ્રગ્સ મળી આવ્યું હતું. જેની કિંમત રૂા. ૫૬,૩૧૦ ગણી હતી. બે મોબાઇલ ફોન, સેન્ટા ફ્રી કાર અને રોકડ રકમ મળી કુલ રૂા. ૬.૬૬ લાખનો મુદ્દામાલ કબજે કર્યો હતો.
ચોંકાવનારી બાબત એ છે કે, ગત એપ્રિલ મહિનામાં જ મૌલિકને એસઓજીએ ૪૦ ગ્રામ મેફેડ્રોન ડ્રગ્સ સાથે ઝડપી લીધો હતો. દોઢેક માસ પહેલા જ જામીન પર છૂટયા બાદ હવે ફરીથી ડ્રગ્સના કેસમાં નામ ખૂલ્યું છે. તેના વિરૂધ્ધ તે વખતે ગાંધીગ્રામ-૨ પોલીસ મથકમાં ગુનો નોંધાયો હતો.
એસઓજીના સૂત્રોએ જણાવ્યું કે બંને આરોપીઓ મૂળ વેરાવળના વતની છે. કાર ગૌરાંગની હતી. મૌલિક પીવા માટે ડ્રગ્સ લઇ આવ્યો હોવાની માહિતી મળી છે. અમદાવાદથી ૨૦ ગ્રામ ડ્રગ્સ લીધું હતું. બાકીનું પોતે પી ગયો હતો. બંને આરોપીઓની ઘનિષ્ઠ પૂછપરછ શરૂ કરાઇ છે.