'અમે માનવતાના ધોરણે ન્યાય માંગી રહ્યા છીએ', INDIA બ્લોકની માર્ચ વચ્ચે મમતા બેનરજીનું નિવેદન

Mamata Banerjee And INDIA Bloc March: INDIA ગઠબંધનના વિરોધ માર્ચ વચ્ચે પશ્ચિમ બંગાળના પૂર્વ મુખ્યમંત્રી મમતા બેનરજીએ ન્યાયની માંગ ઉઠાવી છે. દિલ્હીમાં તેમણે કહ્યું કે, આપણે માનવતાના ધોરણે ન્યાયની માંગ કરી રહ્યા છીએ. બસ આ જ વાત છે, અમને ન્યાય જોઈએ છે. વિપક્ષી દળો SIR અને કથિત વોટ ચોરીના મુદ્દે ચૂંટણી પંચ ખાતે વિરોધ નોંધાવી રહ્યા છે.

સુપ્રીમ કોર્ટ સુધી વિપક્ષની પદયાત્રા

લોકસભામાં વિપક્ષના નેતા રાહુલ ગાંધી, કોંગ્રેસ સાંસદ પ્રિયંકા ગાંધી વાડ્રા, અખિલેશ યાદવ અને તેજસ્વી યાદવે 'લોકતંત્ર માટે માર્ચ' નું નેતૃત્વ કર્યું હતું. આ માર્ચમાં વિપક્ષી નેતાઓ અને સેંકડો સમર્થકો પણ જોડાયા હતા. પ્રદર્શનકારીઓ પદયાત્રા કરતા સુપ્રીમ કોર્ટ તરફ આગળ વધી રહ્યા છે.

રાહુલ ગાંધીએ SIR વિરુદ્ધ સુપ્રીમમાં કરી અરજી

રાહુલ ગાંધીએ મતદાર યાદીના SIRમાં મોટા પાયે મતદારોના નામ હટાવવા અને કથિત અનિયમિતતાઓને લઈને સુપ્રીમ કોર્ટમાં અરજી દાખલ કરી છે. વિપક્ષનો આરોપ છે કે, મતદાર યાદીમાં ફેરફાર કરવાની પ્રક્રિયામાં પૂરતી પારદર્શિતા જાળવવામાં આવી રહી નથી. INDIA ગઠબંધને SIR પર રોક લગાવવાની અને મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી છે. વિપક્ષ આ મુદ્દાઓને ચૂંટણી પ્રક્રિયાની નિષ્પક્ષતા અને મતદારોના અધિકારો સાથે જોડીને જોઈ રહ્યો છે.

મતદાર યાદીમાં પારદર્શિતાની માંગ

INDIA ગઠબંધનનું કહેવું છે કે મતદાર યાદીમાં નામ જોડવાની, હટાવવાની અને સુધારાની પ્રક્રિયા પારદર્શક હોવી જોઈએ. વિપક્ષની માંગ છે કે, યાદીમાં કરવામાં આવતા ફેરફારોની માહિતી સાર્વજનિક કરવામાં આવે અને કોઈપણ માન્ય મતદારનું નામ હટાવતા પહેલા યોગ્ય નોટિસ તથા કારણો આપવામાં આવે. વિપક્ષ ચૂંટણી પંચની કાર્યપ્રણાલી પર સવાલ ઉઠાવતા મતદાર યાદીમાં કથિત ગરબડોની તપાસ અને સુધારાની માંગ કરી રહ્યો છે.

ઉલ્લેખનીય છે કે, તેના એક દિવસ અગાઉ જ લોકસભામાં વિપક્ષના નેતા રાહુલ ગાંધી અને કોંગ્રેસ અધ્યક્ષ મલ્લિકાર્જુન ખડગેએ CJI જસ્ટિસ સૂર્યકાંતને પત્ર લખીને 12 ઓક્ટોબર 2026ના રોજ સાંજે 4 થી 5 વાગ્યા વચ્ચે મુલાકાતનો સમય માંગ્યો હતો, પરંતુ CJI એ આ માંગ ફગાવી દીધી હતી.