દેશમાં વિચિત્ર વાતાવરણ : ગરમી, વરસાદ અને બરફવર્ષા : શ્રીનગરમાં 21 ડિગ્રીનો 135 વર્ષનો રેકોર્ડ

- ઉત્તર ભારતના રાજ્યોમાં સવાર-સાંજ ઠંડી, દિવસે ગરમીની મિક્સ સીઝન 

- રાજસ્થાન, મધ્યપ્રદેશ, છત્તીસગઢ સહિતના રાજ્યોમાં કમોસમી વરસાદ, સિક્કિમમાં ભારે હિમવર્ષા, દિલ્હી-હરિયાણા-પંજાબમાં તાપમાનનો પારો 30 ડિગ્રીની નજીક

નવી દિલ્હી : દેશભરમાં વાતાવરણ અચાનક પલટાયું હતું. પાટનગર દિલ્હીમાં તાપમાનનો પારો ૩૦ ડિગ્રીની નજીક પહોંચ્યો હતો. શ્રીનગરમાં તો ૧૩૫ વર્ષમાં સર્વાધિક ૨૧ ડિગ્રી તાપમાન નોંધાયું હતું. દેશના ઘણાં રાજ્યોમાં એકાએક વાદળછાયું વાતાવરણ સર્જાયું હતું અને વરસાદી ઝાપટાં પડયા હતા. મધ્યપ્રદેશ, છત્તીસગઢ, બિહાર જેવા રાજ્યોમાં વરસાદ પડયો હતો અને સાથોસાથ તાપમાનનો પારો પણ ઊંચો ગયો હતો. રાજસ્થાનમાં આગામી ૨૪ કલાકમાં વરસાદ થાય એવી શક્યતા છે.

શ્રીનગરમાં તાપમાનનો પારો ૨૧ ડિગ્રી નોંધાયો હતો. ગુલમર્ગમાં ૧૧.૫ ડિગ્રી સુધી તાપમાન પહોંચી ગયું હતું. અત્યાર સુધી ફેબ્રુઆરી માસમાં મેક્સિમમ તાપમાન ૧૦ ડિગ્રી નોંધાયું હતું. હજુય આગામી પાંચેક દિવસમાં સરેરાશ તાપમાનમાં બેથી ત્રણ ડિગ્રી સુધીનો વધારો થાય તેવી શક્યતા છે. અત્યારે કાશ્મીરની પહાડીઓ બરફની ચાદરથી ઢંકાયેલી હોય છે, તેના બદલે સૂર્યનારાયણ તપી રહ્યા છે. દિલ્હીમાં તાપમાનનો પારો ૩૦ ડિગ્રીની નજીક પહોંચી જતાં જનજીવનને અસર થઈ હતી. હરિયાણા અને પંજાબમાં પણ તાપમાન ૨૭થી ૨૮ સુધી નોંધાયું હતું અને બે દિવસમાં ૩૦ ડિગ્રીએ પહોંચી જવાની શક્યતા છે. હરિયાણા અને પંજાબમાં માર્ચની શરૂઆતમાં જ તાપમાન ૩૫ ડિગ્રીએ પહોંચી જશે. હવામાન વિભાગના કહેવા પ્રમાણે ટેમ્પરેચર વધવાની સાથે સાથે ઘણાં રાજ્યોમાં વરસાદ પણ પડશે. રાજસ્થાનના ૧૭ જિલ્લામાં વરસાદની આગાહી છે. તે ઉપરાંત મહારાષ્ટ્ર, મધ્યપ્રદેશ, છત્તીસગઢ, બિહાર, તેલંગણા, બંગાળ, આસામ સહિતના લગભગ ૧૦ રાજ્યોમાં વરસાદી ઝાપટાં પડયા હતા.

પૂર્વોત્તરના રાજ્યોમાં પણ હવામાનમાં તીવ્ર પલટો આવ્યો હતો. સિક્કિમના પહાડી વિસ્તારમાં એકાએક ભારે બરફવર્ષા થતાં જનજીવન પ્રભાવિત થયું હતું. હિમાચલમાં પણ હળવી બરફવર્ષા થઈ હતી. કુલ્લૂના નીચાણવાળા વિસ્તારમાં વરસાદ થયો હતો. ઉત્તરાખંડમાં પહાડી વિસ્તારોમાં બરફવર્ષાની આગાહી છે. મેદાની વિસ્તારોમાં તાપમાન સામાન્ય રહેશે. ઉત્તર ભારતના રાજ્યોમાં સવાર-સાંજ ઠંડી અને દિવસે ગરમીનું મિશ્ર વાતાવરણ જોવા મળશે.