બૅન્કમાં મોટા પાયે હડતાળની તૈયારી: સપ્ટેમ્બરમાં 4 દિવસ, ઑક્ટોબરમાં અનિશ્ચિતકાળ માટે આંદોલન; જાણો શું છે માગ

Nationwide Bank Strike 4 Days In September: દેશભરમાં આગામી મહિનાથી બૅંક કર્મચારીઓ પોતાની વિવિધ માંગણીઓને લઈને હડતાળ કરવા જઈ રહ્યા છે, જેના કારણે બૅંકિંગ સેવાઓ પર મોટી અસર પડી શકે છે. યુનાઈટેડ ફોરમ ઓફ બૅંક યુનિયન્સ (UFBU) એ પરફોર્મન્સ લીન્ક્ડ ઈન્સેન્ટિવ (PLI) અને 5 દિવસના બૅંકિંગ કામકાજના દિવસો(5-Day Banking)ની માંગ સાથે હડતાળની જાહેરાત કરી છે. જેના કારણે બૅંક ગ્રાહકોને સપ્ટેમ્બર અને ઑક્ટોબર મહિનામાં મુશ્કેલીનો સામનો કરવો પડી શકે છે. કર્મચારીઓ અને અધિકારીઓના મુખ્ય સંગઠન UFBU એ ત્રણ તબક્કામાં દેશવ્યાપી હડતાળ યોજવાનું આયોજન કર્યું છે.

ક્યારે-ક્યારે બંધ રહેશે બૅંકો?

પ્રથમ તબક્કો (11 સપ્ટેમ્બર): દેશભરમાં 11 સપ્ટેમ્બરે એક દિવસની હડતાળ રહેશે. આ સમયગાળા દરમિયાન શનિવાર અને રવિવારની રજાઓ આવતી હોવાથી બૅંકો સતત 3 દિવસ બંધ રહેશે.

બીજો તબક્કો (28, 29 અને 30 સપ્ટેમ્બર): સપ્ટેમ્બરના અંતમાં કર્મચારીઓ સતત 3 દિવસ હડતાળ પર રહેશે. શનિવાર-રવિવારની રજાઓ ઉમેરીને બૅંકો સતત 5 દિવસ માટે બંધ રહેશે.

ત્રીજો તબક્કો (26 ઑક્ટોબરથી): જો સરકાર દ્વારા માંગણીઓનો સ્વીકાર કરવામાં નહીં આવે, તો 26 ઑક્ટોબરથી અનિશ્ચિત મુદતની દેશવ્યાપી હડતાળ શરૂ કરવામાં આવશે.

મુખ્ય માંગણીઓ શું છે?

5 દિવસનું બૅંકિંગ (5-Day Banking Week): 8 માર્ચ 2024ના રોજ થયેલા 12મા દ્વિપક્ષીય કરારમાં સોમવારથી શુક્રવાર સુધી રોજનો કામકાજનો સમય 40 મિનિટ વધારીને 5 દિવસનું બૅંકિંગ લાગુ કરવા સહમતિ બની હતી. જોકે, હજુ સુધી સરકારની મંજૂરી બાકી છે.

સંશોધિત PLI સ્કીમનો વિરોધ: યુનિયનોનો આરોપ છે કે, નવી PLI (Performance Linked Incentive) સ્કીમમાં મોટા અધિકારીઓ અને સામાન્ય કર્મચારીઓ વચ્ચે મોટો તફાવત રાખવામાં આવ્યો છે, જે ભેદભાવપૂર્ણ છે.

બૅંકિંગ કામકાજને લઈને ગ્રાહકોને અસર

રાષ્ટ્રીયકૃત બૅંકની વિવિધ બ્રાન્ચના કામકાજ પર અસર પડી શકે તેમ હોવાથી ગ્રાહકોને પોતાના જરૂરી કામ સમયસર પતાવી લેવા વિનંતી કરવામાં આવી છે.