ગાઝિયાબાદમાં મોટો અકસ્માત, મકાનનો સ્લેબ ધરાશાયી, કાટમાળમાંથી 10 લોકોને બહાર કઢાયા; બચાવ કામગીરી ચાલુ

Ghaziabad House Collapse : ઉત્તર પ્રદેશના ગાઝિયાબાદ સ્થિત સાહિબાબાદ પોલીસ સ્ટેશન વિસ્તારના શહીદ નગરમાં સોમવારે એક મોટો અકસ્માત સર્જાયો હતો. અહીં એક નિર્માણાધીન મકાનનો સ્લેબ (લેન્ટર) અચાનક ધરાશાયી થઈ જતાં સમગ્ર વિસ્તારમાં ભારે નાસભાગ અને અફરાતફરી મચી ગઈ હતી. ઘટનાની જાણ થતાં જ આસપાસના લોકોની મોટી ભીડ એકત્રિત થઈ ગઈ હતી.

કાટમાળ નીચેથી 10 લોકોને સુરક્ષિત બહાર કઢાયા

આ દુર્ઘટનામાં કાટમાળ નીચે દબાયેલા 10 લોકોને તાત્કાલિક બહાર કાઢી લેવામાં આવ્યા છે. બહાર કઢાયેલા લોકો પૈકી 4 લોકોની હાલત ગંભીર હોવાનું જાણવા મળ્યું છે. કાટમાળ નીચે અન્ય કોઈ વ્યક્તિ દબાયેલી ન રહે તે સુનિશ્ચિત કરવા માટે NDRF ની ટીમ દ્વારા સતત બચાવ અભિયાન ચલાવવામાં આવી રહ્યું છે.

અકસ્માત પાછળનું ચોક્કસ કારણ હજુ અકબંધ

આ મકાનનો સ્લેબ કયા કારણોસર તૂટી પડ્યો તે અંગેની ચોક્કસ વિગતો હજુ સુધી સામે આવી નથી. હાલ વહીવટી તંત્ર અને બચાવ ટીમોનું સંપૂર્ણ ધ્યાન કાટમાળ હટાવવા અને ફસાયેલા લોકોને બચાવવા પર છે. રાહત કાર્ય પૂર્ણ થયા બાદ પોલીસ અને વહીવટી તંત્ર દ્વારા સમગ્ર ઘટના અંગે વિગતવાર માહિતી જાહેર કરવામાં આવશે.