'વિદ્યાર્થીઓનું સાંભળે ઝારખંડ સરકાર, બળપ્રયોગ ખોટો...': રાંચી પ્રોટેસ્ટ મુદ્દે બોલ્યા રાહુલ ગાંધી

Rahul gandhi ranchi protest: ઝારખંડમાં JPSC અને JSSC ભરતી પરીક્ષાઓમાં ગડબડીઓને લઈને વિદ્યાર્થીઓનું આંદોલન વધુ ઉગ્ર બન્યું છે. સોમવારે આંદોલનના 17મા દિવસે રાંચીના રસ્તાઓ પર હજારો ઉમેદવારો વિધાનસભા ઘેરાવ માટે ઉતર્યા હતા. પ્રદર્શન દરમિયાન પોલીસ અને વિદ્યાર્થીઓ વચ્ચે ધક્કામુક્કી, બેરિકેડિંગ તોડવાનો પ્રયાસ થતાં વોટર કેનનનો ઉપયોગ કરવામાં આવ્યો હતો. આ બળપ્રયોગ સામે ઝારખંડની હેમંત સોરેન સરકાર વિપક્ષના નિશાના પર આવી ગઈ છે, ત્યારે કોંગ્રેસ નેતા રાહુલ ગાંધીએ પણ વિદ્યાર્થીઓ પર બળપ્રયોગને ખોટો ગણાવ્યો છે.

રાહુલ ગાંધીએ X પર કરી પોસ્ટ

લોકસભામાં વિપક્ષના નેતા અને કોંગ્રેસ સાંસદ રાહુલ ગાંધીએ સોશિયલ મીડિયા પ્લેટફોર્મ X પર પોસ્ટ લખીને ઝારખંડ સરકારને વિદ્યાર્થીઓની વાત સાંભળવા અપીલ કરી છે. તેમણે જણાવ્યું કે, ઝારખંડમાં વિરોધ પ્રદર્શન કરી રહેલા વિદ્યાર્થીઓ સામે બળનો ઉપયોગ કરવો સંપૂર્ણપણે ખોટો છે. વિદ્યાર્થીઓને શાંતિપૂર્ણ રીતે વિરોધ કરવાનો અને પોતાની વાત રાખવાનો સંપૂર્ણ અધિકાર છે. દરેક સમસ્યાનો ઉકેલ માત્ર વાટાઘાટો અને મંત્રણા દ્વારા જ નીકળી શકે છે.

રાહુલ ગાંધીએ ઝારખંડ સરકારને પ્રદર્શનકારી વિદ્યાર્થીઓની માંગણીઓ અને મુદ્દાઓને તાત્કાલિક સાંભળીને તેનો ઝડપી ઉકેલ લાવવા માટે વિનંતી કરી છે.