અરુણાચલ સરહદે ચીનની ઘૂસણખોરીના દાવા ભારતીય સેનાએ ફગાવ્યા, કહ્યું- અહેવાલો ખોટા અને પાયાવિહોણા

China PLA Camp Inside Indian Territory : ભારતીય સેનાએ સોમવારે તે મીડિયા અહેવાલોને સખત શબ્દોમાં નકારી કાઢ્યા છે, જેમાં દાવો કરવામાં આવ્યો હતો કે ચીનની પીપલ્સ લિબરેશન આર્મી (PLA) એ અરુણાચલ પ્રદેશમાં ઘૂસણખોરી કરીને ભારતીય ક્ષેત્રની અંદર પોતાના સૈન્ય કેમ્પ સ્થાપી દીધા છે. ભારતીય સેનાએ સત્તાવાર નિવેદન જારી કરીને આ તમામ અહેવાલોને સદંતર "ખોટા અને કોઈપણ આધાર વિનાના" ગણાવ્યા છે. સેનાએ સ્પષ્ટ કર્યું છે કે, સરહદ પર સુરક્ષા વ્યવસ્થા સંપૂર્ણપણે ચુસ્ત છે અને ભારતીય સૈનિકો દેશની સરહદોની સુરક્ષા કરવા માટે સક્ષમ છે.

સ્થાનિક સંગઠનના મેમોરેન્ડમ બાદ વિવાદ વકર્યો
આ વિવાદની શરૂઆત ત્યારે થઈ જ્યારે કેટલાક મીડિયા આઉટલેટ્સમાં અહેવાલ આવ્યા કે અરુણાચલ પ્રદેશના અપર સુબનસિરી જિલ્લાના ડેપ્યુટી કમિશનરને 'નાહ વેલફેર સોસાયટી' (NWS) દ્વારા એક મેમોરેન્ડમ સોંપવામાં આવ્યું છે. આ મેમોરેન્ડમમાં આરોપ લગાવવામાં આવ્યો હતો કે ચીનની સેનાએ અરુણાચલ પ્રદેશના ટાક્સિંગ સરહદી વિસ્તારોમાં ધીમે-ધીમે પોતાની હાજરી વધારી દીધી છે. સંગઠનનો દાવો હતો કે ચીને છેલ્લા 6 વર્ષમાં નાહ આદિવાસી સમુદાયની પરંપરાગત ગૌચર, શિકાર અને ખેતીની જમીન પર મોટા પાયે કબજો જમાવી લીધો છે.

જમીન ગુમાવવાનો સ્થાનિક લોકોએ વ્યક્ત કર્યો હતો ડર
NWS ના પ્રમુખ કેરુ ચાદરે મેમોરેન્ડમમાં જણાવ્યું હતું કે, જે વિસ્તારોમાં સ્થાનિક લોકો અગાઉ મુક્તપણે હરી-ફરી શકતા હતા અને વન પેદાશો એકત્ર કરતા હતા, તે હવે ચીનની સેનાના નિયંત્રણમાં છે. સંગઠને એવો પણ આક્ષેપ કર્યો હતો કે ચીને સરહદી ક્ષેત્રમાં રસ્તા, પુલ અને સૈન્ય કેમ્પ બનાવીને પોતાનો પ્રભાવ વધાર્યો છે. વર્ષ 2020 સુધી સમુદાયના નિયંત્રણ હેઠળ રહેલા ઓયિંગ (અસાફિલા વિસ્તાર), પનિયાર, મરપન, પોત્રાંગ તળાવ અને ટિન્ડિંગટાંગ જેવા ધાર્મિક અને પવિત્ર સ્થળો પર ચીની સૈન્યની ગતિવિધિઓ ચિંતાજનક હોવાનો દાવો કરાયો હતો. જો કે, ભારતીય સેનાએ આ તમામ આશંકાઓ અને અહેવાલોને ફગાવીને સરહદે સ્થિતિ નિયંત્રણમાં હોવાનું જણાવ્યું છે.

સરહદ વિવાદ ઉકેલવા ભારત અને ચીન વચ્ચે રચનાત્મક વાતચીત
આ દરમિયાન સરહદી વિસ્તારોમાં શાંતિ જાળવી રાખવા માટે રાજદ્વારી પ્રયાસો પણ ચાલુ છે. ગયા મહિને જ બેઇજિંગ ખાતે ભારત-ચીન સરહદ બાબતો પર પરામર્શ અને સંકલન માટેની સંસ્થાકીય પદ્ધતિ (WMCC) ની 35મી બેઠક યોજાઈ હતી. વિદેશ મંત્રાલયના જણાવ્યા અનુસાર, આ બેઠક અત્યંત "રચનાત્મક અને સકારાત્મક" રહી હતી. બંને પક્ષોએ સરહદી વિસ્તારોની સ્થિતિની સમીક્ષા કરી હતી અને ત્યાં શાંતિ તેમજ સ્થિરતા જાળવવા માટે થઈ રહેલી પ્રગતિ અંગે સંતોષ વ્યક્ત કર્યો હતો. દ્વિપક્ષીય સંબંધોને સામાન્ય બનાવવા માટે બંને દેશો સરહદ વ્યવસ્થાપન અને ક્રોસ-બોર્ડર સહયોગના મુદ્દાઓ પર સતત ચર્ચા કરી રહ્યા છે.